NAG-ABOT na ang adlaw nga amo ang katapusan nga higayon para sa mga kandidato nga makahimo sang pagtal-us sa ila kaupod nga nagbangil sa posisyon ukon nagpat-in sang mohon agud nga indi matandog sang iban.
Matalupangdan man ang mga kandidato nga nakabasa kag may ihibalo sa patakaran sang Comelec bangud nga nagahampang sila sa palibot sang sini nga patakaran, kahibalo sila magtiyog nga indi sila maguot.
May mga kandidato nga ginpauna sa pagpalista sa isa ka posisyon ang ila nga suod kag masaligan nga kaupod sa partido nga nag-file sang certificate of candidacy sa ila naluyagan nga posisyon.
Ginbangilan nila agud nga kon magtal-usanay na, may yara sila sang gabuton kag may yara naman sang igatibsok nga bag-o nga kandidato.
Indi naton sila mabasol bangud nga may higayon nga nasaad sa patakaran sang Comelec nga mahimo nila hampangan. Nanugon sila sa ila posisyon nga nagaganar pa kag may mga ginalantaw pa nga mga benepisyo nga mahimo makwa antes sa posisyon magbiya.
Suno sa Resolution No. 10430 sang Comelec, wala sang tal-usanay ukon withdrawal nga pagatugutan matapos ang Nobyembre 29,2018.
Gin-athag sang Comelec nga ang pagtal-os sa kandidato nga napatay, nag-withdraw sang iya kandidatura ukon na-disqualify ang mahimo maka-file sang certificate of candidacy ukon COC sa ila opisina antes ukon subong mismo nga adlaw sang Nobyembre 29, 2018 agud nga ang ngalan sang magatal-os ang mabalhag sa opisyal nga balota.
Ginpaathag dugang sang Comelec nga ang pagtal-os sa kandidato nga napatay ukon gin-disqualify paagi sa final judgment ang maka-file sang COC tubtub sa tungang-adlaw sa adlaw mismo sang piniliay.
Pagabatunon ina sang Comelec basta ang magatal-os nga kandidato kag ang pagatal-usan nga kandidato ang may magkapareho nga apelyido.
Wala ginatugutan ang pagtal-os sa anuman nga independent candidate suno sa Comelec.
Subong mismo nga adlaw aton masaksihan ang pag-ilis sang kandidato sang ila mga panit, kaangay sang man-og nga nagaluno, agud nga ipakita ang ila matuod nga interes kag huyog sa palaabuton nga piniliay.
Madamo sa mga kandidato ang magagwa sa ila alukaba kag magapakilala sa ila matuod nga kahimtangan kag tinutuyo sa sini nga eleksyon.
Madamo sa ila ang naggamit sang sini nga padugi agud nga dampigan ang ila kaugalingon nga interes kag agud nga mapabilin ang ila poder kag gahum sa pulitika.
Ini ang adlaw sang ila pagtigbaylo, ang pagbukad sang ila matuod nga dagway, ang maathag nga hurma sang ila bayhon ang aton na masalapuan, makita kag mapamatud-an.
Karon nga nagtukal na ang ila alukaba, nag-ilis na ang ila panit, kag nagtuhaw na ang ila mga matuod nga dagway, ang aton sarang mahimo sini amo ang paghimbis sa ila tinutuyo kag ang pagtukib kon ano ang matuod kag butig sa mga tinaga nga nagakawas sa ila tagsa ka baba.
Indi naton mapaiway ang pagtal-usanay apang may mahimo kita agud nga mautngkad ang ila motibo kag kon ano ang ila ginatuyo sa pagpangalagad sa isa ka posisyon.
Pamatian naton sila kag timbangon ang tagsa ka pulong, atubangon naton sila kag takson sa ila sensiridad, amumahon naton sila kag himulsuhan sa ila katuyuan. (bertladera@gmail.com/PN)
