NAGAPABILIN nga dako nga palamangkutanon subong kun ano ang matabu kun magbag-o ang power distributor sa syudad.
Ano ang matabu kun ang MORE Electric and Power Corporation (MORE Power) ang mahatagan sang franchise sa syudad sang Iloilo kag indi na mahatagan sang kahigayunan nga ma-renew ang franchise sang Panay Electric Company (PECO)?
Ano ang mangin kapalaran sang mga empliyado sang PECO?
Sining damlang lang ang duha ka mga opisyal sang magtimbang nga kumpaniya gin-interview sa isa ka cable channel. Nagpasalig sanday Roel Castro sang MORE Power kag Luis Miguel A. Cacho, chief executive officer sang PECO, nga wala sang matabu nga blackout sa syudad sang Iloilo.
Pasalig ni Cacho, indi nila pagpabay-an ang ila mga empliyado samtang nagakabuhi ang kumpaniya, ilabi na nga nabutang sa MORE Power franchise bill nga magapadayun sa pag-operate ang PECO sang duha ka tuig samtang ginapadayun ang transition.
Sa bahin naman ni Castro, nagpahayag ini sang kahandaan nga magbuligay sa PECO agud masiguro nga wala sang empliyado nga mahul-an.
Panindugan naman ni Cacho, bisan may franchise ang MORE Power nagapabilin nga buhi ang ila aplikasyon sa Committee on Legislative Franchises sa Kamara.
Sa karon lunsay pa lamang sugilanon ang tanan bangud wala pa sang pinal nga desisyon sa franchise application sang tagsa-tagsa.
Samtang dalal-on na lang sa Bicameral Conference Committee ang franchise bill sang MORE Power, ara pa nagapabilin sa committee level ang aplikasyon sang PECO.
Subong man kun sa karera nakaabanse na ang MORE Power, pero ang PECO nagapaningkaras pa kag mabaskog pa ang pagginhawa.
Samtang nagapangako ang MORE Power sang estable kag barato nga bili sang kuryente, ini tanan sugilanon pa lang bangud ang pamabod sini kun may una na nga bill nga mabaton ang konsumidor gikan sa MORE kun sila gid man ang mahatag sang franchise.
Ang masobra sa 64,000 nga konsumidor wala nagapati sa sugilanon bangud ang plastada kun sa estorya sa kalye, tupa lang ang atun.
Kun ang MORE Power na ang mangin power distributor sa syudad sang Iloilo, makaginhawa ayhan sang matawhay ang mga Ilonggo?
Ang sabat sina mahibaluan naton kun sila gid man ang atun power distributor sa masunod nga tuig. (jpranco1975@gmail.com/PN)
