NAGALANOG ang 13 ka mga lingganay gikan sa ikaduha nga panalgan nga balkonahe sang St. Clement’s Church sa tagsa ka may hiwaton nga balaan nga misa kag ilabi na karon nga pagpatigayon sang “Simbang Gabi.”
Mabatian ang mga lingganay nga nagatukar sang “Joy to the World”, “Come All Ye Faithful”, “Silent Night”, kag mga lalantunon sa tagsa ka may ginahiwat nga Novena mass.
Naga-isahanon ang St. Clement’s Church nga may carillon bells nga ginapalagting ni Winston Poblacion, kag ini man ang simbahan sa Pilipinas nga naghiwat sang pinakauna nga Novena mass.
Nagalanog ang 13 ka mga lingganay paagi sa iya octave notes kag may magkatuhay nga kadakuon kag tono; nga tuhay sa iban nga mga simbahan nga recorded kag ginapatukar paagi sa electronics.
Sadtong Setyembre 1952, nag-order si Fr. Francis Burns sang 13 ka lingganay gikan sa kompaniya nga Gillet & Johnston nga nabase sa London, England kag kilala nga taghimo sang de kalidad nga mga orasan kag mga lingganay.
Ginhandom ni Fr. Burns nga mailog ang mga lingganay gikan sa iya dutang natawhan nga Belfast, Ireland.
Sadtong Enero 18, 1953 sang gindala sa Manila gikan sa London ang mga lingganay nga may Gaelic inscriptions kag pagkalipas sang isa ka semana ini ang nag-abot sa Iloilo kag gin-instolar sang hubon ni Fr. Arthur Maloney sa tore sang simbahan kag sadtong Pebrero 6 naglanog ang una nga musika sang lingganay.
Dapat ipabugal, dapat tukibon kag pakamahalon ang pinasahi nga kinaiya sang 13 ka lingganay sa St. Clement’s Church.
Madamo man sang nagalabay ang makabati, madamo man sang nagasimba ang nagapamati sang lanton sang lingganay apang pila lamang ang nakahibalo sang iya nga maragtas kag kon ano ang ginhalinan sang sini nga mga lingganay.
May yara sang nagasiling nga sa ila pagpati isa ka narekord nga lalantunon ang ila ginapamatian kag ginapatukar lamang paagi sa electronics ukon sa mga makabag-o nga gadget sang subong nga henerasyon.
Apang lipod sa ihibalo sang kadamuan, ginapatukar ini paagi sa pagsunod sa talamdan agud nga magsibu ang habyog sang higot sa bagting kag pagsantik sini sa lingganay nga makapagwa sang tono nga tuman ka nami pamatian sa dulunggan.
Dapat naton hangpon nga sa tagsa ka maglanog ang lanton gikan sa 13 ka mga lingganay, nagakahulugan ini nga kita ang ginadapit pasulod sa ganhaan sang St. Clement’s Church agud nga magpakigbahin sa balaan nga misa ukon sa dinag-on na nga pagpatigayon sang Novena mass.
Padayon nga nagapang-agda ang simbahan sa tagsa ka tinuga nga mag-upod sa ginahiwat nga ‘Simbang Gabi’ agud nga mahatagan sang lubos nga kahulugan ang ginasaulog nga panahon sang paskwa.
Ginaganoy sang lingganay ang mga kalag nga mag-ampo kag magpasalamat sa mga bugay nga nabaton, kabakod sa pag-atubang sang mga pagtilaw kag ang padayon nga pag-ubay kag pag-amlig sa matag-adlaw nga tanan.
Mabakas kita magtipon sang ‘13 fruits’ para sa aton handa sa ibabaw sang lamesa, dapat magbakas man kita sa pagdumdom kag pagpamati sa lanton sang 13 ka lingganay sang St. Clement’s Church./PN
