KADA PANAHON sang Paskwa, nagalaum ang halos tanan nga makabaton sang regalo.
Pila lang ayhan sa ila ang nagapaminsar sa paghatag sang regalo sa iban?
Sa masami presyo sang regalo ang balasehan sa paghatag sang kalipay sa ginahatagan ukon sa magabaton. Ini palatandaan nga nangin materialistic na ang tawo sa pagsaulog sang Paskwa.
Halos tanan ginakulang na sang oras sa pagtambong sa mga party. Buslot naman ang bulsa sa pagbakal sang ila iregalo sa ila manita ukon manito. Indi gid magbakal sang regalo nga baratuhon kay basi hikayan sang magabaton. Ukon nagakumod man ang mabaton kay indi kuntento sa ginregalo sa iya.
Kun sa pagkaon man nga ihanda, lunsay pagkaon sang mga dumuloong ang nakahanda sa lamesa. Wala na ang mga kinaandan nga pagkaon nga may mga kahulugan para sa pamilya. Mga pagkaon kaangay sang mapilit kag matam-is agud magpabilin nga malapit ang pamilya kag matam-is ang ila pagtamdanay. Kaladlawan nga pagpati pero may maayo naman nga katuyuan.
Subong ang noche buena products tuman ka mabakal. Halos gaagawa ang tawo sa pagbakal sang ham, pasta, sauce, cheese, kag fruit cocktails. Tanan gusto maghanda sang spaghetti, salad kag kun anu-ano pa nga matam-is, maalat kag matambok nga mga pagkaon. Kun wala ini nga mga handa kun Paskwa, pigado gid ang pamatyagan ta.
Maathag nga mas ginahatagan sang bili sang tawo subong ang mga material nga bagay. Bunga ini sa komeryalismo kag materyalismo sang pagsaulog sang Paskwa. Nagmadinalag-on ang mga negosyante nga mabag-o ang panan-awan sang tawo sa Paskwa. Kun sang una kalinungan, pagpalangga kag pagpatawad ang ginapakahulogan naton sang Paskwa, subong ginasandig natun ang selebrasyon sa kwarta kag material nga bagay nga atun ginauyatan ukon mabaton.
Moderno na gid man ang panahon bangud modern na ang estilo naton sa pagsaulog sang Paskwa. Kun si Jesus simple lang ang kabuhi matapos nabun-ag sya sa pasungan, kita sobra ang paghandum sang mga material nga bagay.
Materyalismo ang nagasakop sa atun tagsaka tagipusoon./PN
