KINAANDAN na ang paghiwat sang Christmas party sa tagsa ka mga opisina ukon ulubrahan bilang pagpabatyag kag pagselebrar sang Paskwa. Nagaululupod sa pag-ambit sang ginhanda nga mga pagkaon, sa masami may lakip nga makahulubog nga ilimnon, kag nagabayluhanay sang mga regalo.
Nagabakal kita sang regalo para sa aton mga ihado kag ihada, para sa mga pinalangga sa kabuhi kag sa mga tawo nga may maayo nga kabubut-on sa aton. Ginadumdom naton sila bangud nga nangin maayo, maalwan, kag mabuot sila sa aton. Kag kon kaisa nagahulat kita sang balos gikan sa mga tawo nga ginpakitaan naton sang kaayo.
Ginapili naton ang pagpaambit sang paskwa sa mga tawo nga makapaambit man sa aton sang ila grasya. Ginapahalipay naton ang aton kaugalingon kaupod ang mga tawo nga may yara man sang ikasarang kag aton mga kaangay sa pangabuhi.
Ini ang aton naandan na nga hilikuton, nangin tradisyon na naton sa malawig nga panahon, ginapasa-pasa sa nagasunod nga henerasyon sa malawig na nga ginag-on.
Apang, may nakahimo na bala nga imbis magkaon kag mag-inom sang makahulubog nga ilimnon, itigana ini sa mga kulabos sa pangabuhi, ihatag sa ila ang pondo para sa Christmas party paagi sa pagbakal sang pagkaon agud matilawan man nila ang manamit nga kalan-on. Mahimo man nga ibakal ang kwarta sang mga bagay nga makabig makabulig sa ila pagpangabuhi ukon sa ila matag-adlaw nga pagsinarayo.
Magamay man ang ina nga bagay sa aton panan-awan apang daku na nga bulig sa mga nagakinahanglan. Daku nga yuhum ang mangin kabaylo sang bagay nga igahatag mo sa ila.
Matuod nga nagatuhay ang aton pag-apresyar sa mga bagay bangud nga yara na kita sa sitwasyon nga mas kinahanglan naton ang mga branded nga gamit, mas mahal ang presyo kag mapabugal sa aton sosyudad. Apang sila nga wala pa nakatilaw ukon nakasalapo sa sini nga mga bagay, mas ila maapresyar ang katam-is sini nga sa aton panamil nangin malas-ay.
Imbis nga magsinadya kita paagi sa pahampang, ano ayhan kon sila ang aton pahampangon kag sila ang hatagan sang premyo? Indi ayhan mas makahulugan ang ina nga premyo bangud nga mas maamo nga tawo ang imbolbado kag mapalapnag naton ang kasadya?
Manami man ayhan nga imbis kita ang magbayluhanay sang regalo, magabakal kita kag ihatag sa komunidad nga wala sang kabaylo? Pasalamatan gid sang mga makabaton sang regalo ang aton nga pagpaambit sa ila sang matuod nga kahulugan sang paskwa.
Ginpadaku kita sa sini nga kahulugan sang selebrasyon, apang mahimo naton ini nga ligwaton agud nga mas mapalapnag naton ang grasya nga aton naagom paagi sa pagpakigbahin sa mga kubos nga kaangay naton.
Ang kahulugan sang paskwa amo ang pagpakig-ambit sa mga grasya nga nabaton, sa pagpalupangod sa mga kubos, sa pagpabatyag sa ila nga may mga kaangay mo nga tawo nga nagabalikid sa ila bisan pa nga mapin-ot man ang imo kahimtangan.
Kuntani ini ang aton ipatudok sa masunod nga henerasyon, tudluan naton ang mga bata nga mangin maalwan sa ila kasubong paagi sa pagpaambit sang regalo ukon pagkaon./PN
