GINAPA-AUDIT ni Atty. Romeo Gerochi sang Freedom from Debt Coalition sa Energy Regulatory Commission (ERC) ang Panay Electric Company (PECO).
Suno kay Gerochi apat ka mga bagay ang iya gusto nga i-audit sang ERC sa PECO. Ini amo ang meter deposit nga ginabayad sang tagsa ka konsumidor para sa ila metrohan; bill deposit nga amo ang estimated nga consumption sa isa ka bulan sang naga-apply sang connection nga dapat i-refund makaligad ang isa ka tuig; ang overcharging, kag ang depreciation expense nga ginamando sang kasuguan nga dapat ibutang sa trust fund.
Suno kay Gerochi gusto niya nga i-annotate ang mga assets sang PECO nga may claim ang mga konsumidor bangud sang nasambit nga mga bagay nga dapat ma-audit.
Dugang pa ni Gerochi nga importante nga mahibaluan kun pila ang claims sang mga konsumidor sa assets sang PECO samtang ginabaisan kun sin-o sa ila sang MORE Power ang maga-distribute sang kurytente sa syudad sang Iloilo.
Nahibauan nga maga-expire na ang franchise sang PECO sa Enero 18 samtang aprobado naman sa bicameral committee sa Kognreso ang franchise bill sang MORE power.
Kun basehan ang mga pahayag ni Gerochi makabig nga nahibaluan nya ang husto nga banas nga usuyon sa pagpakig-away sa PECO.
Maathag nga may mga specifics ukon natumod nga isyu si Gerochi nga nabalay sa kasuguan kag nahibaluan bangud sang maid-id nga pagtuon. Kunsabagay, nadaug na nila sang makaisa ang ila kawsa kontra PECO.
Malapit na lang ang Enero 18, ang petsa sang pagtapos na sang franchise sang PECO. Apang wala sang dapat nga kabalak-an bangud nagpasalig na ang PECO nga indi sila mag-untat sa pagdeliber sang kuryente.
May duha ka tuig nga ginhatag sa MORE Power nga kumpletuhon ang tanan nga requirements para sa isa ka Distribution Utility (DU) agud maka-deliver sang kuryente.
Siling ni Gerochi indi ini transisyon kundi normal nga plaso agud may higayun ang MORE nga maka-comply sang mga kinahanglanon. Kun ma-comply nila ini ukon indi, ina ang balantayan. (jpranco1975@gmail.com/PN)
