NAGAPANAGBALAY na ang ispirito sang Dinagyang. Ginapalagbungan sang tunog sang tambor ang tagsa ka balatyagon kag paminsaron sang mga pumuluyo. Ginapabatyag ang tinion nga dapat magselebrar kag ipabugal ang kinaiya sang mga Ilonggo.
Halos ang tanan nga tribu nagpakita sang ila pagkahanda sa ginhiwat nga opening salvo sang Enero11, pambukas nga pagpasundayag sang mga tribu. Ila ginpakita ang ila pagpang-ingganyo sa mga tumalan-aw.
Sa pagahiwaton nga Dinagyang, lauman naton ang maguot nga ilig sang trapiko sa mga mayor nga dalanon sang syudad, ilabi na sa bahin sang Calle Real, kon sa diin limitahan ang pagsulod sang mga depasahero nga salakyan agud hatagan sang ligwa ang pagparada kag pagpasundayag sang mga tribu sa bag-o nga grandstand.
Kag kuntani indi na pagligwaton ang ngalan ukon islan sang bag-o nga ngalan ang Iloilo Freedom Grandstand. Bisan pa nga gin-isdog ukon gin-isol ang iya nahamtangan apang ang iya ngalan ang indi dapat maislan.
Nangin simbolo na ini sang mga balatyagon, paghimakas kag pagpahayag sang mga Ilonggo, nangin maragtason kag puno sang handumanan.
Liwat nga mapukaw ang aton pang-ino-ino sa pagdumdom sa aton nagliligad, sa mga handurawan kag sa mga handumanan dala sang mga una mga higayon sa pagtambong sa mga pagpasundayag.
Magkatuhay nga tukar, ritmo ukon tono ang aton mabatian. May mapagsik may maluya, may nagasunod sa mga moderno nga mga ambahanon.
Puno sang entusyasmo ang mga ulihing-tubo nga bag-o pa lamang maka-eksperyensya sang sini nga hilikuton, nagalaum sila nga makakita sang hilway kag mabatyagan ang tagsa ka lanog sang tambor.
May walo ka tribu nga magapasakop sa Iloilo Dinagyang Festival 2019 gikan sa Freedom Grandstand sa Muelle Loney kag sa mga ruta sang parada sa palibot sang Calle Real. Magasaot sila sibu sa tukar sang tambor.
Ang mga tribu nga ginalakipan sang Panayanon sang Iloilo City National High School, Salognon sang Jaro National High School, Ilonganon sang Jalandoni Memorial National High School, Dagatnon sang Ramon Avanceña National High School, Paghidaet sang La Paz National High School, Hugponganon sang Tiu Cho Teg-Ana Ros Foundation Integrated School, Pan-ay sang Fort San Pedro National High School, kag Barriohanon sang Bo. Obrero National High School.
Kuntani maglantaw ang kadamuan sang mga pumuluyo, ilabi na sang mga ulihing-tubo bangud sila ang magabenepisyo sa kon paano ginapatigayon ang mga hilukuton. Sa ila igapasa ang maragtason nga manggad sang kultura sang mga Ilonggo.
Kuntani maapresyar sang mga pamatan-on nga indi lamang ini pagsaot ukon pagpalanog sang tambor. Dapat ila man padalman kon ngaa ginahimo ini naton sa tagsa ka tuig. Dapat nga giyahan sang mga manunudlo sa tagsa ka buluthuan ang ila mga estudyante agud mahangpan ang katuyuan kag maragtas sang sini nga buluhaton. Indi dapat mangin pagtuman lamang agud nga mahatagan sang grado ang isa ka estudyante nga nagapasakop.
Buylugan sang tanan agud nga mangin mapagsik kag kasadya ang pagselebrar sang Dinagyang Festival.
Mangin magansal ang tambor kon madamo ang nagapulpog kag masadya ang pagsinaot kag ang tagsa ka paglanog magapukaw sa kalag kag sa panimuot. (bertladera@gmail.com/PN)
