INI NA seguro ang pinakamasakit nga pahayag ni Presidente Duterte batok sa mga Obispo, lakip na seguro ang ordinaryo nga mga pari, nga posible may ginapakita nga mahulas nga pagsinalayo sunu sa pagtan-aw ni Presidente.
Sa iya pamulong-pulong sang sini lang sa tion sang pagselebrar sang kaadlawan ni Masbate Governor Antonio Kho, ginsiling ni Presidente ang masunod (sunu sa balita sa isa ka pahayagan nasyonal):
“Hoy, kayong mga tambay diyan, pag dumaan yang Obispo ninyo holdapan ‘yan, maraming pera ‘yan p***** i** niya… Patayin n’yo…”
Tungod sa sining pamahog sang Presidente, daw nakugmat man gani kita nga mga pumuluyo nga nagatahod sa mga Obispo kag kaparian katoliko, sa kabug-usan, nga ang sumulunod nagadamo sing mga 80 ka porsyento sang aton populasyon.
Ano na lang abe kon sundon sining mga tambay, kag iban pa nga wala nagatahod sa ila, ang panugyan ni Presidente?
Popular pa kaayo si Presidente kag posible may ara da sing fanatiko sa iya mga sumulunod nga basi magtuman sang iya panugyan batok sa sining mga Obispo nga ang pangabuhi, para sa iya pagpati, taliwas sa ila ginatudlo sa mga tumuluo.
In fact, indi man naton madula nga basi may mga fanatiko man nga mga tumuluo nga maghimo sing indi maayo sa Presidente tungod sa sining pamahog niya sa kaparian.
Nadumduman ko pa ang natabo sa isa ka prime minister sang isa ka daku nga pungsod. Ginpa-raid niya ang isa ka simbahan. Wala ini maluyagan sang pila ka tumuluo, nga kalakip gali sa security mismo sining prime minister. Sus, ginpatay gid sang duha sa ila ining ila prime minister tungod sa sining pang-insulto sini sa ila simbahan!
Tani indi ini matabo sa mga Obispo kag mga kaparian kag subong man kay Presidente kay indi kita luyag matabo nga magpinatyanay na lang kita sa aton kalain sing buot sa isa kag isa.
Samtang, wala sing kabalaka ang kaparian sa sining panugyan ni Presidente nga pamatyon sila sang posible mga fanatiko niya.
Ini ang ginpabatyag ni Novaliches Bishop-Emeritus Teodoro Bacani Jr. sa isa ka interbyu sa radyo.
Siling niya nga wala sila nahadlok sa sining pamahog ni Presidente sa ila kabuhi kag gin-“dare” pa niya ang Presidente.
“Meron lang akong friendly challenge kay Presidente Duterte,” siling niya, “Simple lang na ganito. Alam niyo kaming mga Obispo naglalakad, wala kaming bodyguard, wala kaming bullet-proof vests, wala kaming mga security aides na nakapaligid na marami, wala kaming dalang baril, gano’n kami,” siling niya sa sining interbyu.
“Ang challenge ko kay Presidente Duterte na kung talagang matapang siya, simple lang, gawin niya yung ginagawa namin (na naglalakad na walang security escorts).”
Ginsabat ini sang spokesperson ni Presidente. Ginsiling sini nga ginatumod lang sang Presidente ang mga Obispo nga nagapatambok sang ila bulsa kag nagapangabuhi labag sa ila “teachings”.
Ang buot niya silingon seguro sa “teachings” amo nga ang mga pari dapat mangabuhi sing mas ispiritual kag kulang sa materyal nga pangabuhi.
Of course, wala nagakahulugan nga kon manggaran ka indi ka na makapangabuhi ispiritwal. Pwede man ang isa ka tawo nga sakay sa kotse samtang ispiritwal ang ugali kag nagahimo sing ispiritwal nga bagay katulad sang pagbulig ukon pagpatigayon sang kaayuhan sang mga kubos. Aba, madamo nga manggaran ang nagahimo sina! Lakip na si Presidente Duterte, no doubt.
***
Ang matuod amo nga indi makapagusto ang mga pari sa ila hulag sa pangabuhi, bisan pa nga madamo sa ila ang natawo nga manggaran kag tugot sa pagpanag-iya sang propyedad, katulad sang mga Dominicans kag Augustinians.
Ang mga Hesuwita, katulad ni Pope Francis, indi gani tugot manag-iya sang propyedad tungod sang ila vow nga “Poverty, chastity and obedience.”
Ang mga pari sa parokya sa Iloilo, sa nahibal-an ta, may sweldo, kon sweldo man ang tawag sini, nga mga P15,000 lang sa kada bulan nga pwede nila magamit sa ila personal nga kinahanglanon, manggaran man sila ukon kubos sing ginhalinan.
Pareho lang ini sa sweldo sang mamumugon sa tag-P500 kada adlaw. So, indi naton masiling nga masulhay man ang ila pangabuhi. Ang mga manggaran sa ila, segurado ko nga limitado man ang ila pagpangabuhi tungod sa ila misyon ispiritwal bilang pari. (w_mateojr@yahoo.com/PN)
