BISAN diin lang basta may oportunidad, may ara gid nga nagahingalit agud makapamintaha.
Subong nga Dinagyang 2019, madamo sang mga nagahingalit agud makapangwarta personal.
Nabuyagyag ang pag-resell sang mga tickets nga gikan sa P1,600 ginabaligya sang iban sa balor nga P2,500. Indi bala paghingalit ina?
Huwebes sang gab-e naglapta naman ang ginaalegar baligyaanay sang mga VIP tickets.
Ang VIP tickets ginahatag sang opisina ni Mayor Jose Espinosa III sa mga kapitan sang syudad, Regional Directors kag iban pa nga bisita sang alkalde.
Sa impormasyon, may 1,000 ka tickets nga VIP nga ipanagtag ang alkalde. Una nga nakabaton amo ang mga kapitan sang barangay sa syudad. Kun pila sa ila ang nakabaton, wala natun nahibaluan. Basta nagpila lang sila sa opisina sang alkalde.
Sin-o ayhan ang nagabaligya sang VIP tickets? Ang ginhatagan bala ukon ang nagapanagtag?
Sa pahayag ni Mayor Joe III dako ang iya pagrespeto sa mga ginahatagan niya sang VIP tickets gani wala sya nagalaum nga may magagamit sini agud hingalitan nga makwartahan. Bisan diin lang may mahingaliton gid.
***
Sa pinakauna nga kahigayunan makaligad nga naglinyahanay sanday Cong. Jerry Treñas kag Mayor Jose Espinosa III, nagpalapit ang mayoriya sang mga kapitan kay Espinosa.
Ang mga kapitan nga ginatumod amo ang mga nagasuporta sa kandidatura ni Treñas.
Ini nga mga kapitan amo ang nagabastos kag daw wala sang pagtaha sa alkalde. Ini amo ang mga kapitan nga ang iban sa ila halos indi magpasulod sa ila barangay sa alkalde.
Klaro gid nga masarangan sang mga kapitan magpakabal sang nawong basta may benepisyo sa ila kaugalingon. Hamakon mo sa ticket sa Dinagyang, ginpatay nila ang huya kag nagpila sa alkalde.
Pero may mga nakaligad na nga mga hitabu nga halos gani makahatag sang respeto sa alkalde ang mga kapitan sang Jaro. Pila ayhan sa ila ang naglinya agud makakuha sang ticket?
Ginplanuhan nga indi pagsuportahan ang kapyestahan sa Jaro apang may nawong man gale mangayo sang ticket?
Matuod pribelihiyo nila ina halin pa sang una. Pero maathag nga kun para sa ila kaayuhan, handa man sila magyaub. Bahala na lang galing pagkatapos.
***
Basta hala bira kita. Viva Señor Santo Niño! (jpranco1975@gmail.com/PN)
