NAGAPANGINPADLOS pa kuntani sa mga patakaran si Mayor Jose Espinosa III kag luyag gid nga hatagan sang ligwa ang iya mga bisita nga makakaon sang tinion sang mga tumalambong sang nagligad nga Dinagyang Festival 2019.
Ginpilit sini nga hatagan ang kada isa sa mga bisita sang duha tubtub tatlo ka minutos nga ligwa sa pagpamulong-pulong kag gin-anunsyo pa nga keynote speaker sanday Sen. Cynthia Villar kag anay Special Assistant to the President Bong Go.
Bangud sa iya anunsyon, naghingagaw sa pagpagwa sang pahayag ang Iloilo Dinagyang Foundation, Inc. (IDFI) nga dapat wala sang “epal” kag wala sang kandidato nga magapalawig sang pamulong-pulong ukon sang ila presensya sa lugar sang kahiwatan.
Posible nga nakalab-ot na sa igdulungog sang ila nga tinawo diri sa syudad ang mabaskog nga panindugan sang mga tawo, sang IDFI kag mismo kita ang naghimo man sang open letter sa Facebook tuhoy diri.
Nakamuklat ang mga pulitiko bangud nga nabalhag sa mga nasyunal kag lokal nga pamantalaan ang pangabay sang mga pumuluyo nga indi dapat malamudan sang pamulitika ang kahiwatan sang Dinagyang Festival.
Bangud sa mga panugyan sa mga kandidato gikan sa panindugan sang IDFI kag sang mga Ilonggo, halos makita ang katagam sa ila nga mag-uyat sa mikropono agud nga makapalab-ot sang ila mensahe sa tumalambong.
Kaangay sa nahisugtan kag una na nga nabantala, si Senator Villar lang ang naghambal apang sa malip-ot lang nga higayon. Naghatag siya sang mensahe sang pagpanamyaw.
Indi man naton masikway kag madalukan ang mga Ilonggo nga lideres nga makahatag sang ila medyo malawig nga mensahe kaangay nanday Sen. Franklin Drilon kag Gov. Arthur Defensor Sr.
May madamo pa nga mga kandidato ang nag-abot, apang kaangay sila sang panganod nga naglabay sa kahawaan, ginhuyop sang hangin kag nadula sa panan-awan.
Ginlawag ang ila ngalan sang nag-master of ceremony nga si Mayor Jose Espinosa III, ginpakilala siya nila sa publiko sa indi kombenyente nga paagi kag wala sang tudok nga kaseryoso sa pag-abi-abi sa mga bisita.
Wala sila naka-uyat sang mikropono, posible natahap, posible ginpahibalo na sang patakaran kag posible nagalikaw nga sila ang tabugon sang mga tawo paagi sa pag-boo sa ila.
Nalikawan ang malawig nga pamulong-pulong sang mga pulitiko kag mga kandidato apang wala nalikawan, wala napunggan kag nadaray sa iya ginapangwakal ang alkalde sang syudad. Posible ini ang nagpalawig man sa okasyon bangud ginhulat siya nga makatapos antes makasugod ang makahalawat-hawat nga pagpasundayag sang mga tribu.
Nagtukal ang alkalde sa iya alukaba. Nalipat siya nga yara siya nagatindog sa atubang sang madamo nga tawo, sa mga ambassadors, sa mga dumuluong kag sa mga dinapit nga bisita. Ginkabig niya nga nagasugilanon lang siya sa kapehan sa sulod sang merkado sang La Paz.
Wala niya ginhandaan kon paano ipakilala sa sibilisado kag dungganon nga paagi ang iya mga bisita.
Mismo ako nga nagapamati kag nagalantaw sa iya ang daw makupos sa kahuya. Nalipat siya nga ang Dinagyang Festival isa ka world-class event.
Salamat na lamang bangud nga mas may delikadesa ang mga bisita sang syudad sang Iloilo./PN
