DUNA na sa tawo ang pagkarelamador. Tanan nga problema halos ibasol sa gobyerno. Bisan simple nga basura, gobyerno ang basulon.
Pero napamangkot man bala naton ang atun kaugalingon kun kita nangin kabahin sining mga salawayon?
Pinakahalimbawa subong amo ang reklamo nga madamo sang basura ang Iloilo Esplanade kag guba na ang mga tanum sa mga island sang karsada.
Madasig mag-viral kun may makita nga nagatumpok nga basura. Dayun basol sa gobyerno nga wala nagahimo sang trabaho. Iresponsable kag wala sang hinimuan ang ara sa poder.
Pero anay ka, sin-o ang naghaboy sang basura dira sa Iloilo Esplanade? Sin-o ang nagguba sang mga tanum sa island sang mga karsada?
Ining mga kuno health conscious kag nagakabuhi sang matinlo nga masami nagakadto sa Esplanade, ining mga kabataan nga ginahimo nga talabuan sang ila karelasyon ang Esplanade, ining mga nagalabay lang nga indi makatago sang ila basura, may kunsensya pa man bala sila?
Imposible man nga ang gobyerno ang magkadto dira kag maglapta sang basura kun indi kamo? Tapos kamo pa ang reklamador?
Indi man bala kamo pwede makatago sang inyo basura kag ihaboy kun may makita nga basurahan?
Pwede man bala nga indi lang kamo magpakita-kita sang katinlo kundi himuon nyo bisan wala sang magatulok?
Ngaa tanan lang ibasol ta sa gobyerno? Kun tagsa sa atun responsable lang kag may pag-ulikid, wala ini nga problema.
Huo, matuod nga katungdanan sang gobyerno nga maninlo sang mga basura. Pero kun sa atun pa lang matinlo na kita, indi amo sini ka dako nga bulto sang basura ang makita ta. Ang problema sa atun, iresponsable na, reklamador pa kag salawayon pa.
***
Dalayawon si Ramon Cua-Locsin.
Kahapon, Byernes, nagsaulog sang ila New Year ang atun kauturan nga mga Filipino-Chinese. Pila lang ini ka adlaw ang iya ulot sang nangin madinalag-on man ang atun 51st Dinagyang Festival.
May isa ka tawo nga ginagamit ang poder kag liderato agud mangin madinalag-on ini nga mga kahiwatan. Ini amo si anay city councilor Ramon Cua-Locsin. Indi mahilig sa mileage pero sekreto nga nagatrabaho kaupod sa iya mga grupo para sa madinalag-on nga kahiwatan nga iya ginapangunahan.
Dapat isa si Locsin sa hatagan man sang padungog sang city government bangud sang iya makabig hugot kag lubos-lubos nga serbisyo nga wala man sang ginapaabot nga balik sa iya.
Panginbolahan kay Ramon Cua-Locsin, isa ka madinalag-on nga Filipino-Chinese businessman sa syudad sang Iloilo. (jpranco1975@gmail.com/PN)
