INDI mapanas sang panahon, padayon nga nagapag-on ang pagtuo sang mga deboto sa patron sang distrito sang Jaro kag sang bug-os nga Western Visayas.
Naglipas na ang pila ka dinag-on, pila ka henerasyon sang mga tumuluo ang nagbulos-bulos sa pagpakita sang ila pagpasidungog sa patron tubtub nga lubos ini nga ginbisita ni Pope John Paul II.
Sang nagligad nga Pebrero 2, liwat nga nagsaulog ang distrito sang Jaro sang kapiyestahan ni Nuestra Nuestra Señora de la Candelaria de Jaro ukon Our Lady of Candles nga isa ka Marian title kag imahe sang debosyon sang mga Katoliko nga Pilipino.
Liwat nga ginpilahan ang imahen nga nahamtang sa balkonahe sang Jaro Cathedral, madamo sang mga deboto ang luyag nga makahapulas sa kristal kag makaduhol sang ila pagpangamuyo sa atubang sang imahen.
Madamo sang mga katigulangan nga wala nalipat sa personal nga pagpadulong diri sadto ni Pope John Paul II para sa canonical coronation sang imahen sadtong Pebrero 21, 1981.
Nangin bantugon ang patron bangud man sa mga milagro nga ginpakita sini suno sa mga katigulangan. Ang sugilanon naglapta, naglaton kag nagsaylo-saylo sa pila na ka henerasyon kag tubtub subong nagapabilin ini nga ginasugid sa mga pamatan-on.
Una nga nagtuhaw ang imahen sadtong 1587 suno sa mga tradisyon, sang ang grupo sang mga manugpangisda nakakita sini nga nagalutaw sa suba sang Iloilo. Una na nga ginsiling nga indi masarangan nga hakwaton ang imahen bangud sa iya kabug-at, apang sang ila gindesisyunannga dal-on sa Jaro didto na kag nagmag-an kag mahapos nga dal-on.
Una nga ginbutang ang imahen sa gamay nga kahon malapit pinakamataas nga bahin sang simbahan, apang suno sa mga sugid-sugid nagadaku ang imahen sa paglipas sang pila ka dinag-on tubtub nga ini ang ginsaylo sa balkonahe.
Makita karon ang imahen sa balkonahe sang simbahan, malantaw kon ikaw nagaatubang sa katedral kag mapalapitan paagi sa pagsaka sa pila ka lintang sang hagdan.
Madamo sang deboto gikan sa iban nga probinsya ukon bahin sang pungsod ang nagapadulong sa distrito sang Jaro agud nga magsimba, maghalad sang pangamuyo, magsindi sang kandila, kag magbakal sang perdon.
Sa paglipas sang panahon, ang piyesta sang Jaro ang nabantugan bangud sa pila ka adlaw kag sultada sang bulang. Nabantugan man bangud sa tuman ka damo nga negosyo nga nagtuluhaw sa sulod kag sa gwa sang plaza. Madamo na sang kontrobersya ang nabatian, madamo na sang imbestigasyon ang ginpatigayon apang tubtub karon nagapabilin nga malangsa ang pagpasulabi nila sa kwarta labaw sa pagtuo.
Nagapabilin nga mapag-on ang simbahan sang Jaro, nagabakod ang pagtuo sang mga deboto kag wala nagakapukan ang iwag sang perdon apang ang mga nagakamog sa kon pila ang ila maganar kag maginansya sa ila padugi sa mga negosyo sa plaza ang nagapadayon man. Pila na ka lideres ang nag-ilis apang ang mga dalok sa pilak sa paghugakom sa ila maganar sa plaza ang nagapabilin.
Nagabag-o man ang nagapungko, apang tudok ang kadalok nga tinutuyo. Padayona ng ila pagmusing sa plaza sa nakalipas nga pila na ka dekada./PN
