ANG mayoriya sa Sangguniang Panlalawigan (SP) sang Iloilo, nga maka-Biron, gapati upod kay DBM Secretary Benjamin Diokno nga ang 4th tranche sang pagsaka sang sweldo nga ginpatuman ni anay Presidente Aquino kada tuig – sugod sadtong 2016 tubtub sa 2019 – makuha lang sa 2019 Budget, kag indi sa re-enacted 2018 Budget, ugaling pwede mapa-retroact.
Katuhay naman ang tindug sang pila ka myembro sang Kongreso nga ginapangunahan ni House Majority Leader Rolando Andaya Jr. kagSenate Minority Leader Franklin Drilon.
Gapati sila nga ang 4th tranche pwede ihatag sa mga empleyado sumugod mismo sa Enero 2019 halin sa savings sang re-enacted 2018 Budget. Upod man sa sining tindug si Gob. Arthur Defensor Sr. sang Iloilo.
Indi bala lakip pa sa re-enacted 2018 Budget ang ano man nga savings nga mabilin sa 2018 Budget? Daw amo man gani ang aton pagpati.
Siling pa gani ni Gob, ang pag-release sang 4th tranche sang mga empleyado sa kapitolyo indi pwede ma-retroact, ukon ibalik sa Enero 2019 kundi kon san-o ma-aprubahan ang 2019 Budget.
In other words, kon sa Marso 2019 pa ma-aprubahan ang 2019 Budget, sunu sa plano sang yara sa grupo ni Biron sa SP, sa Marso 2019 pa sugod mabaton sang mga empleyado sang kapitolyo ang ila 4th tranche.
Mga P500 pa ina kada bulan sa mga kubos ta nga mga empleyado kag mga P700 sa may mas taas-taas gawa nga salary grade.
Ginakasubo ini ni Gob kay kon ginhingagaw lang aprubahan ang 2019 Budget bag-o matapos ang Disyembre 2018, nga wala matigayon sang maka-Biron sa SP, tani wala na problema ang pag-release sining 4th tranche sa Enero 2019 mismo.
Labi nga ginkasubo pa gani ni Gob ini sa iya pagpati nga ang pag-delay sang pag-aprubar sang 2019 hampang sa pulitika sang mga maka-Biron sa SP.
“Ginpasulabi pa nila ang ila pamulitika sangsa kaayuhan sang mga pumuluyo,” siling gani ni Gob.
Samtang nag-petisyon na ang madamo nga mayor nga padasigon ang pag-aprubar sang 2019 Budget. Pati na ang pila ka mga barangay, nga ginpangunahan sang Cabatuan kag Sta. Barbara.
***
Pero, ngaa gid bala dapat ma-release ang 4th tranche sang salary increase sang mga empleyado sa idalom sang Salary Standardization Law (SS) mismo sa Enero 2019?
Daw indi gawa maathag ang kasuguan parti sa sining 4th tranche sa kaso sang mga empleyado sa gobyerno nasyonal. Kag sa karon may kaso na gani nga ginpasaka sa Korte Suprema.
Sa kaso ugaling sang mga empleyado sa lokal nga mga gobyerno maathag ini sa idalom sang Local Government Code, sunu kay Gob.
Ginatindugan gid ni Gob ang ginamando sang Sec. 325 sa Local Government Code nga indi pwede mapa-retroact, ukon mapabalik ang pag-release sang 4th tranche sa Enero 2019.
Ang Salary Standardization Law nagasiling lang nga i-release and 4th tranche sa tuig 2019 kag wala nagatalana kon san-o ini ihatag sa mga empleyado.
On the other hand, ang Sec. 325 (g) nagasiling: “(g) The creation of new positions and salary increases or adjustments shall in no case be made retroactive…” Sa aton pa, indi pwede ma-retroact ang paghatag sang 4th tranche.
Kon sa Enero ma-authorize ini mahatag, ti sa Enero man masugod ining bulanan nga dugang nga sweldo. Kon sa Marso pa, ti sa Marso man.
Samtang, nangin patag-awayan na sang duha ka grupo nanday Congressman Ferjenel Biron kag Congressman Arthur “Toto” Defensor Jr., nga pareho nga nagapadalagan sa pagka-gobernador sang Iloilo, ang ining pag-aprubar sang 2019 Budget.
Samtang man, nag-petisyon na ang madamo nga mga meyor nga padasigon ang pag-aprubar sang 2019 Budget. Pati na ang pila ka mga barangay, nga ginpangunahan sang Cabatuan kag Sta. Barbara.
Kon padayon ang ining tug-of-war sa isyu sang 2019 Budget, sin-o ayhan ang apinan sang mga pumuluyo, labi na gid sang mga botante nga mahusgar sa ila sa palaabuton nga eleksyon sa Mayo 2019?
Ang yara sa poder sa grupo ni Gob upod kay Toto Defensor, ukon ang nagapanghawid nga grupo ni Biron?
Ini gani ang ginpamangkot man ni Liga president Larry Deatras sang Sta. Barbara, kag dapat na seguro tagaan sing sabat sang mga pumuluyo sa karon mismo. (w_mateojr@yahoo.com/PN)
