ANG TAWO nga nagahigugma napun-an sang kalipay. Apang kun ang paghigugma mapaslawan, wala naman sang tupong nga kasakit kun batyagon.
Tanan kita nagahigugma sa paglaum nga mangin malipayun sa luyo sang atun ginahigugma. Apang paano na lang kun ang atun ginahigugma amo man ang magatuga sang kasakit sa atun tagipusoon? Doble ang sakit indi bala?
Sa nakaligad nga adlaw sang mga tagipusoon ukon Valentine’s Day halos tanan nagapabugal sang ila nabaton nga regalo nga pungpong sang bulak kag tsokolate. Ang mga nakabaton syempre malipayon apang ang wala may nagasiling nga okay lang pero may iban gid nga na-stress.
May iban sa atun nga simple lang ang pagsaulog sang Valentine’s Day. Pero may iban naman nga espesyal kuno ang adlaw para sa sa ila kahagugma gani ihalad nila ang ila pagkababaye ukon pagkalalake.
Sa mga nakaligad nga Valentine’s Day gutok ang mga lodging houses apang subong, mamingaw ang mga ini. Siling sang iban base kun nagbag-o na ang panan-awan gani indi na basta-basta nga ginahimo regalo lang sa kahagugma ang pagkababaye. Ukon base may iban na sila nga lugar nga ginakadtuan kay nabuking na ang ila diskarte?
Sa record sang Task Force on Morals and Values Formation sang city government, may mga minor nga nagtuyo pa sulod sa mga lodging houses kaupod sang mga legal na ang edad. Indi lang babaye nga minor kundi may mga lalaki man.
Hamakon mo wala pa gani makalambot sa edad nga 18 apang gusto na magtilaw sang bulohaton nga para lang kuntani sa mag-asawa?
Nagahigugma ka agud malipay kag may mangin kaupod sa matahum nga palaabuton, indi nga iregalo ang imo pag kababaye ukon pagkalalake.
Tandaan natun nga ginbutang ini sang Ginoo sa tunga sang atun duha ka hita agud kun indi ka magbika indi makuha.
Buot silingon, dapat indi lang basta-basta nga ihatag ang pagkababaye ukon pagkalalaki sa tawo nga wala sang kasiguraduhan kun mangin kamo tubtob sa katubtuban.
Sa kadamuon sang mga nagakawasak nga pamilya subong, makasiling kita nga nagahuyang na ang pagpakahulogan sang karon nga henerasyon sa paghigugma. Ang paghigugma subong kaangay nga nabalay lang sa kun ano ang mahatag nga kalipay sa lawasnon nga aspeto kag indi ang pangkabug-usan nga pagkatawo.
Sa pagkasalimpapaw sang gugma nga ginasaluhan sang tawo subong. Basta lang mapuno ang unodnon nga kalipay, gugma na para sa ila.
Samtang nagalakat ang panahon, nagaugdaw naman ang paghatag sang balor sa paghigugma. Ang anay sagrado nga hulubaton, ginabungat na lang agud makuha kun ano ang sa idalum sang pus-on. (jpranco1975@gmail.com)/PN
