BASTANTE gid ang iban subong nga election. Bastante bangud masako lang ang patawag sa ila sang mga politiko.
Bastante gid sanday kapitan kag kagawad, idugang pa dira ang mga barangay leaders nga masami ginapatawag sang mga politiko. Ginapasumpa sila nga mangin landslide ang daug ni Mr. Politiko sa ila barangay.
Amo man ang pangako nila sa ila amo nga politiko gani pagbalik sa ila barangay hala sila pamahog kag pang-ipit sa ila pumuluyo nga ginadudahan nila nga indi magsuporta sa ila amo nga politiko.
Sila ang nagaganar sang kwarta pero ginagamit nila nga peon ang ila mga pumuluyo agud lang makapangwarta.
Sa tagsa ka election, amo na ini ang modus sang mga opisyal sang barangay. Sige lang sila panghothot sa politiko gamit nga kapital ang mga bumuloto. Pila na ayhan ka libo ang nabaton nanday Kap kag kagwad? Inyo pila na ang nabaton nyo? Lunsay laway lang siguro ang ila dala pabalik sa inyo barangay.
Masakit man batyagon nga sila ang nagaganar sang kwarta pero ang mga pumuluyo ang ila kapital agud mapadaug kuno ang politiko nga ila ginasakdag. Sa malip-ot nga pulong, ginabaligya nila sa politiko ang ila mga residente.
Pakabal lang nawong ini nga mga opisyal sang barangay. Makita nga nagapadayaw pa sa ila pagsakdag sa politiko nga ila amo.
Kun si kap kag si kagawad nagabaton sang linibo ka pesos, maayo na gid ayhan nga may isa ka gatos sila nga ihatag sa inyo. Sila ang nagakabi dako, kamo nagaboto nga makapadaug sa ila amo.
Ngaa amo gid sini ka supog ang mga kapitan? Ngaa maisog sila subong nga election?
Maayo na kuntani ang ginatawag nga empowerment kun para sa kaayuhan. Apang ang ila empowerment amo nga kun paano mangwarta sa politiko kag ibaligya ang ila mga pumuluyo.
Panugyan lang sa atun nga mga kauturan. Sunda kun sin-o ang inyo nahamut-an. Maayo man kuntani kun indi kamo magbaton sang kwarta ugaling mahapos ka nga mamarkahan nga kontra. Gani batuna ang kwarta kag botohon ang nahamut-an sang inyo dughan. Indi man ina nila mahibaluan kun nagboto kamo ukon wala.
Ti-on na nga padudlaon ang mga politiko nga nagadaug gamit ang ila kwarta. Ayhan kun mapyerde sila bisan naggasto pa sang dako nga balor sang kwarta makapanumdom na sila nga si kap indi man makapadaug sa ila.
Bilang protesta, indi pagbotoha ang ginaduso ni kap kay sya nakakwarta nga ikaw ya ang ginagamit nya nga pangkapital sa amo niya nga politiko.
Kun malutos ang kandidato ni kap, sigurado nga madudla na sila. Kun malutos ang kandidato nga naggamit sang kwarta, indi naman ina sya makapang-ipita pa kay wala na sya sa poder.
Kag pat-ud gid si kap kag si kagawad ninyo, kun sin-o ang madaug, didto na sila magatipyok.
Sa matuod lang, kawarta-kwarta lang ang hampang. (jpranco1975@gmail.com/PN)
