GINALIBOT sang MORE Power ang mga negosyante agud magpakita sang isa ka presentasyon nga kuno mapanubuan nila sang masobra sa piso ang ila sukot per kilowatt hour kun magsugod na sila sang serbisyo sa mga Ilonggo.
Kaangay man ang MORE Power sa iban sang una nga pangako ang manubo nga bili sang kuryente gani nakuha nila ang simpantiya sang mga Ilonggo. Amo man ina ang pasalig sang Panay Energy Development Corp. (PEDC) sang naga-apply pa lamang sila sang mga permits para sa construction sang duha ka generators sang coal-fired power plant nila. Sang nag-operate na sila, wala man sang gin-nubo ang presyo sang kuryente sa syudad.
Subong ini naman ang pangako sang MORE Power. Bal-an ta naman na nga basta gani mas barato, makagalanyat gid ina.
Pero maathag man sa ila nga presentasyon nga sa generation charge sila nagabase nga mapanubuan nila ang ila power rate. Ini nga pasalig hapaw kag wala sang kasiguraduhan. Paano ka makasiling nga mapanubuan mo ang imo sukot nga wala ka pa gani sang power supply contract sa mga power suppliers? Sa malip-ot nga sugilanon, palupad ang estorya.
Ginabanta nila nga may P1.3 billion nga total project capital expenditure (CAPEX). Ini ang madala sang reliability sang power supply. Pero ang pamangkot, indi nila pagbawion ang ini nga CAPEX?
Tandaan naton nga ang CAPEX ginabawi ina sang power distributor sa publiko paagi sa pagpatong sa ila ginasukod sa konsumo sa kuryente sang tagsa ka panimalay.
Apisar nga ginpalakpakan sang mga negosyante ang presentasyon sang MORE Power sa isa ka hotel sang nagligad nga semana, may pila sa ila nga wala nakuntento sa mga pahayag sang MORE Power president nga si Mr. Roel Castro. Para kay Iloilo Federation for Information Technology (IFIT) executive director Joeven Tansi ang presentasyon ni Castro “vague kag not concrete.” Buot silingon, indi maathag kag indi man kongkreto.
Siling ni Tansi kuntani may maathag kag natumod na nga mga tikang kaangay sang timetable sa pagtukod sang infrastructures ang MORE Power bangud ara na sila sa ti-on sang transisyon gikan sa PECO.
Sa karon nga madamo sang mga negosyo ang nagasulod sa syudad, ginsiling ni Tansi nga indi man sila makasabat sang diretso sa mga investors bangud wala sang mahatag nga sabat ang PECO kag wala man nagahatag sang kasiguraduhan ang MORE Power.
Namangkot man si IFIT chairman Jessraf Palmares kun san-o magapatindog sang poste sang ila substation ang MORE Power. Ang sabat ni Castro indi sila makasiling bangud kun magkaso ang PECO magaagi sila sa proseso.
Ayteh, gahulat gali ya ang MORE Power nga kuhaon sang gobyerno ang negosyo sang PECO kag ihatag sa ila? Di bala indi man patas? Ilonggo nga negosyante, kuhaan sang negosyo kag ihatag sa pangayaw?
Tanan nga ginasugid karon sang MORE Power lunsay lang palutaw nga sugilanon. Sila nagalingling na sang ginansya sa ila negosyo, kita nga mga ilonggo nagasalangisag kun ano ang matabu sa palaabuton.
Kinahanglan ta ang maathag nga sugilanon, indi ang sugilanon kag haum-haom./PN
