PILA ka bulan na ang nakaligad kag naglinapta sa social media ang pagbayaw ni Davao City mayor Sara Duterte-Carpio ang kamot ni Cong. Jerry Treñas sang Iloilo City.
Siling sang kampo sang koresista gin-endosar na kuno ni Inday Sara si Treñas. Pero wala man sang ginbuy-an nga pahayag si Sara nga gi-endosar niya si Treñas.
Sadtong Marso 6 sa rally sang Hugpong ng Pagbabago sa Las Piñas City ginbayaw man ni Sara ang kamot ni incumbent Iloilo City mayor Jose Espinosa III. Luwas sa pagbayaw sang kamot may No. 1 sign pa nga campaign sign ni Mayor Espinosa.
Ano ang kahulugan sini? Buot silingon bala nga may duha ka kandidato si Inday Sara diri sa syudad sang Iloilo?
Simple lang ang kahulugan sang akto ni Sara.
Ini amo ang pagpanigurado nga sin-o man kanday Treñas kag Espinosa ang magadaug, kaalyado niya. Buot silingon wala ini sang bearing sa kandidatura sang duha kundi mas makapulos diri si Inday Sara. Ilabi na nga nagaplano sya nga magpadalagan sa pagkapresidente sa 2022 presidential elections.
Sa ila nga duha ni Treñas kag Espinosa, ang kampo sang kongresista ang mas naghatag sang dako nga bug-at sang pagbayaw sang kamot ni Treñas. Kaangay bala nga nakakuha sila sang mabakod nga salandigan subong nga election. Kaangay nga nakasigurado sila sang kadalag-an bangud sang pagabyaw sang kamot ni Sara.
Samtang sa bahin ni Espinosa, pasimple lang ang hulag. Kibot lang ang tanan nga nag-banner na sa local nga pamantalaan ang pagbayaw ni Inday Sara sang kamot ni Espinosa. Pat-ud gid nga nagsiga ang mata sang mga kontra ni Espinosa sa ginhimo ni Inday Sara.
Sa wala ginalauman, ginbayaw ni Sara ang kamot ni Espinosa nga may No. 1 sign pa. Siling sang iban daw enjoy ni si Inday Sara sa pagbayaw sang kamot ni Espinosa.
Paano naman gale ang iban nga nagapabugal man sang suporta sa mga Dutertes? Paano si Kapitan Efren Gimeo nga close man kuno kay senatoriable Bong Go?
Kumusta naman si Pacita Gonzalez nga malapit man kay Duterte bangud kay House Speaker Gloria Macapagal Arroyo?
Sa diin naman ang grupo sang Pederalismo nga ginapamunuan ni anay kapitan kag mayorable Esteban Abitang?
Basi makibot ang tanan, malusot pa si Mel Carreon nga malinong lang ang pagpangampanya.
Ano gid bala ang buot silingon ni Sara sa pagbayaw sang kamot sang mga politiko? Suporta sa ila?
Ukon pagpaniguro sang isa ka politiko nga sigurista?/PN
