SANG iya pagkampanya sa presidential election sadtong 2016, ginpangako ni anay Davao Mayor, kag karon Presidente, Rodrigo Duterte nga tapnaon niya ang salot sang ilegal nga droga sa sulod lang sang 3 tubtub 6 ka bulan.
Ang paborito nga ilegal nga droga diri sa Filipinas amo ang shabu, cocaine kag marijuana, pati na ang mg party drugs katulad sang ecstacy, nga ang overdose sini ang kabangdanan sang kamatayon sang isa ka dalaga sa Cebu sang sini lang.
Of course, wala kita nagapati nga lubos gid matapna ang paggamit sang ilegal nga droga.
In fact, dapat wala katapusan ang pag-away naton sini kay yara si Satanas nga padayon man ang pagsulay sa tawo.
Man, ang ilegal nga paggamit sang droga daw prostitusyon ini nga indi mapa-untat.
Ini sila amo ang duha ka mabaskug nga instrumento ni Satanas agud mapahilayo ang tawo sa Diyos – ang sobra nga kaibug sa unod kag ang sobra nga pagpangalipay nga bisan magpangurus lang kon masandad indi na mahimo.
Ma-untat lang ini seguro kon kita tanan ang magsunod sa panugyan sang Diyos nga untatan na ining malain nga mga bisyo. Ugaling lang, imposible nga matuman naton ini tanan kay sige man ang sugyot ni Satanas sa kahuyang sang tawo.
Ang mga poderoso nga mga pungsod, nga ginapangunahan sang Estados Unidos, indi gani makapa-untat sang drug trade.
Sa matuod man, sige gihapon gani sa aton pungsod ang salot sang droga bisan sa wala pahuway nga away sang Gobyernong Duterte.
In fact, admitido mismo ni Duterte ang padayon nga paglapnag sang paggamit sang droga. Kon mga 4 ka milyon lang sadto ang mga durugista, galab-ut na ini sa mga pito ka milyon, siling gani niya sang sini lang.
Tungod sini, daku nga rason sang Gobyernong Duterte ang padayon nga Gyera kontra Droga. Kag sa mas mataas pa nga level sa karon.
Ang problema ugaling kay may naggwa nga narco-list sang sini lang nga tutok gid sa ginapatigayon nga kampanyahanay sa eleksyon sa Mayo 2019.
Tungod sini, may suspetso ang iban nga ginagamit ini sang Gobyernong Duterte agud piangon ang oposisyon sing wala sa lugar. Paano?
Sa kampanya sang mga kandidato sang administrasyon, ginpaseguro ni Presidente nga ang ila mga kandidato “clear sa droga”.
Ti, ano ang buot silingon sina? Nga wala sa narco-list ang mga kandidato ni Duterte. Kag sila lang ang maayo, kag indi ang yara sa narco-list kag ang ila mga kaugyon sa partido ukon koalisyon.
In other words, pagpakalain ining narco-list sa mga kandidato kontra sang iya ni Duterte paagi sa “public shaming” agud indi sila botohon.
Sin-o man abe ang matarong nga tawo (nga laban pa sa aton mga pumuluyo) ang luyag magboto sa mga drug personalities tungod sa nahibal-an ta na ang kalainan nga dulot nila sa aton sosyedad?
***
Of course, wala kita nagasiling nga patu-patu lang ang ining akusasyon sa mga yara sa narco-list. Posible man nga may kamatuoran ang kaso sang iban, apang posible man nga inosente ang iban pa kon mahusgaran na sila sang husgado.
Nahibal-an man ina seguro sang mga pumuluyo kon sin-o ang mga drug personality nga dapat nila likawan, kag indi na kinahanglan ipahayag pa ang ila mga ngalan tungod pati ang mga inosente madalasa sa pagpakahuya, nga indi bagay.
***
Sadtong pagpungko gid ni Presidente sa pwesto, ginsiling sini nga may 150 ka drug personalities sa iya listahan, nga nagalakip sang mga hwes, mga mayor, kag opisyales sang PNP kag military.
Nangin mga 80 na lang ini karon sa listahan ni Duterte, sunu sa DILG. Ang nahingadlan sa karon amo ang 46 nga nagalakip sang 35 ka mayor, 7 ka vice mayor, isa ka provincial board member, kag 3 ka kongresista.
Kag indi lang basta ginhingadlan sila sa narco-list. Gin-paylan gid sila sang mga administrative cases agud pabudlayan. Kag agud mahuy-an kag suspetsahan samtang indi pa mapamatud-an, ano pa!
Kon husto ang paghangop ta sini – nga ang narco-list pahito lang sa pulitika – isa ini ka dirty tactic nga labag sa tindug mismo sang Duterte administration for “clean and honest election” nga dapat man naton pakalainon. (w_mateojr@yahoo.com/PN)
