KADUNGAN sang pag-ulhot sang mga dalagku nga edipisyo ang pagpasangkad sang dalan kag paghatag sang ligwa sa ruta sang mga salakyan.
Madugay na nga problema kon paano solusyunan ang kumplikado nga sitwasyon sang mga dalanon sa syudad. Madamo kita sang ordinansa nga ginpasar, may mga ginatun-an nga ipasar kag may mga napasar na nga nalipatan nga ipatuman.
Matuod nga indin masolbar sang ordinansa ang kagutok sang dalan kon ang problema yara sa kultura kag kinaiya sang mga tawo nga nagagamit sang karsada.
May mga nagadala sang salakyan nga wala sang pasunaid sa iban, nagadulog sa bisan diin lang kag bisan sa alang-alang nga makasablag sa iban. Mahilig kita sa rason nga “dali lang” ukon indi lang gid dugay, apang ang ini nga akto ang may daku na nga epekto sa nagasunod nga salakyan kag sa isa ka gutlo sang orasan, nagalawig ang pila sa likod kag madamo na ang naapektuhan.
Kinaandan na nga sitwasyon ang pag-igod sang salakyan sang pila ka minutos sa mga mayor nga dalanon, ilabi na kon nagapadulong ka sa ganhaan sang mga buluthuan kag natayming nga nagapasulod ukon nagapagwa ang mga estudyante.
Tuman ka dugay ang pagpanakayon gikan sa ginahalinan pakadto sa padulungan bangud sa indi tayuyon nga paglarga sang salakyan. Indi na maisip kon pila ka dulog na ang nahimo sang dyip antes ka makalab-ot sa imo destinasyon.
Ang problema yara sa kultura sang mga motorista kag bangud man sa “ningas-kugon” nga pagpatuman sang mga ordinansa sa trapiko. Kon wala sang bantay sa dalan, masaku ang pagpadungol sang mga drayber. Kon madugay na ang traffic aide sa isa ka lugar, nangin amiguhay na sila sang drayber kag indi na siya makakita sang paglapas, ilabi na kon siya ang ginahatagan sang senintimos.
Apang, lantawa bala ang sitwasyon sang dalan kon mahugod ang aton mga otoridad sa pagpatuman sang kasulhay sa ilig sang trapiko. Kon hugot ang pagbantay kag dakpon gilayon ang nakalapas, nagamanton man ang mga drayber kag nagalikaw man nga madakpan.
Pila ka adlaw na nga akon namutikan nga nagasulhay ang ilig sang trapiko, matawhay ang dalan bangud wala sang may naga-park sa kilid, wala sang may nagabalabag nga dyip kag wala sang may naga-double parking.
Kuntani isa pa sa hatagan sang pagtamod ang mga nagabaligya sa kilid sang karsada nga naga-okupar sang espasyo para sa mga nagalabay nga tawo kag sa mga nagabantay sang salakyan.
Ang dalan indi balaligyaan kag may yara kita sang kasuguan para diri nga dapat ipatuman.
Kon madasig ang ilig sang trapiko, mangin madasig man ang transaksyon kag madamo sang mahuman nga mga hilikuton nga mas makapasanyog sang aton ekonomiya.
Ipatuman ang ordinansa nga wala sang pili, patas kag alalangay. Ipatudok sa mga motorista kag pasahero nga may kasuguan nga dapat tumanon para sa kasulhay sang tanan.
Ipatudok pa gid nga ang dalan para sa tanan, indi para sa pila lang ka mga may sarang sa kabuhi.
Ang ilig sang trapiko amo ang ugat sang kauswagan nga indi dapat mabarahan ukon masablagan. (bertladera@gmail.com/PN)
