UNA sa tanan, gina-congratulate ko, upod kay misis, ang palangga namon nga anak nga si Jollina sa iya pag-gradwet Magna Cum Laude sa kurso nga BSE Math sa West Visayas State University sa palaabuton nga Abril 2019.
Good job, ‘nak! Ang kapisan sa pagtuon nagbunga gid man. Good luck kag God bless!
***
Duha man lang ang amon anak – pulos babaye. Ang magulang, si Jowenna, take-one man sa CPA exam sang sini lang. Graduate siya sang Accountancy sa Central Philippine University kag nagatrabaho subong sa Commission on Audit.
Maalam ining amon mga anak kag consistent honor student halin elementarya tubtub hayskul.
Gani, bisan sa kapigaduhon sang amon pangabuhi nga mag-asawa – ako lang ang pigado sa amon mag-utod nga anom tungod lain nga direksyon sang kabuhi ang akon gin-usoy – wala kami gawa nabudlayan sa pagpatapos sa ila sa kolehiyo kay madamo ang luyag magbulig sa ila pagtuon.
Full-tuition scholar ang kamagulangan namon nga si Jowenna sang akon mga hinablos nga sanday Dr. Gus de Leon kag Cielo Mateo-Gealon de Leon sang Florida, USA. tubtub sa pag-review niya sa CPA board.
Si Jollina naman full-tuition scholar halin elementarya sa San Jose Parochial School ni Mr. Lorenzo Jamora kag sang Twin Hearts Foundation sang Jamora Family tubtub nagtapos sa high school sa University of San Agustin. Nagsaylo siya sa WVSU agud magkuha sang kurso nga BSE Math. Ginsuporta gihapon siya sang Twin Hearts diri bisan sa paghatag lang sang allowance sa katapusan nga tuig nga libre na ang iya pagtuon sa WVSU.
Wala man nagpabaya si maninoy niya Tommy Que sang Iloilo Supermart agud magdugang bulig sa paghatag sang allowance sa iya. May educational assistance man siya sa pagtuon sa WVSU halin kay Cong. Jerry T. Treñas para sa iya dugang nga kinahanglanon.
Madamo gid nga salamat sa inyo nga tanan sa bulig nga nahatag ninyo sa amon mga anak. Kon wala ining bulig ninyo tani nabudlayan gid kami kaayo sa pagpatapos sa ila.
Sa liwat, madamo gid nga salamat sa inyo nga tanan! Bugayan kamo sang Diyos sa inyo kaalwan!
***
Isa sang ginahangad sang mga kandidato sa panahon sang eleksyon amo ang bloc voting, ukon tingub nga boto, sang Iglesia ni Cristo.
May sobra duha ka milyon nga botante sila sa pungsod sa diin may mga 40-50 ka milyon nga botante, nga daku nga bulig sa ila kandidato sa nasyonal kag lokal nga eleksyon.
Of course, sa nasugilanon ta nga myembro, may nagalisa gid man sa pagboto sa gwa sang bloc voting. Ma-konsyensya man kuno sila kon indi magboto sa mga kandidato sa diin may kabalaslan sila, katulad sang ubra diin nabuligan sila sa pagpasulod.
Matuod, mabudlay ang mangin ingrato sa isa ka Kristiyano bisan pa sa sugo sang mga yara sa ibabaw. Mas mataas ang kasuguan sang Diyos sangsa tauhanon nga pamunuan nga nagasugo nga botohon ang mga kandidato nga indi lakip ang matarong nga mga kandidato nga may kabalaslan sila.
Sunu gani sa isa political analyst, mga 80 ka porsyento man ang masami naga-upod sa bloc voting sang INC sa mga kandidato nga gina-rekomenda sang ila pamunuan.
Sang sini lang ugaling natublag ang liderato sang INC tungod sang kontrobersya sa sulod mismo sang ila pamunuan nga nag-resulta sa pagpatalsik kag paggwa sang pila ka ministro.
Ginatan-aw ini nga hitabo nga makapahuyang bisan paano sang bloc voting sang INC sa Mayo 13, 2019 nga eleksyon.
Samtang, amat-amat man nagatuhaw ang bloc voting sa pila ka sektor sang mga katoliko batok sa mga kandidato ni Presidente Duterte. Ina tungod sa wala pahuway nga bombatso ni Presidente, nga indi katoliko, sa mga pamunuan kag kaparian sang Simbahan Catolica, pati na gani ang Simbahan mismo.
Bisan ang nagailinaway nga mag-ulutod nagahugpong kon ang kadungganan na sang pamilya ang tandugon.
Ginapanan-aw ining hitabo nga makatulod sa Simbahan agud suportahan ang Otso Deretso nga mga kandidato sa pagka-senador sang oposisyon nga sanday Alejano, Roxas, Bam Aquino, Tañada, Hilbay, Diokno, Macalintal, kag Gutoc.
Kon matabo ini, wala sing basulon ang mga kandidato ni Presidente Duterte kundi ang sige pag-atake sini sa Simbahan Catolica. (w_mateojr@yahoo.com/PN)
