NAGTAKOP na ang school year 2018-2019 sang Abril 5. Kadam-an sa mga pangpubliko kag pribado nga eskuelahan nakatapos naman hiwat sang ila culmination exercises.
Ang iban nga ulihi nagsugod sa pagbukas sang klase, nagahingapos naman sang mga academic activities agud makompleto ang number of days nga gin-require sang Departamento sang Edukasyon despues magahimo man sang ila closing exercises.
Sini’ng karon lang, gin-agda ako nga mangin Inspirational Speaker sang Bagongbong A Elementary School, isa ka remote barangay sang Barotac Nuevo, Iloilo.
Mas o menos walo ka kilometro ang kalayuon sini sa munisipyo. Apang bangud indi maayo ang dalan, utod-utod ang pagsemento, ilisipon lang ang mga nagabyahe nga traysikol didto.
Ginpanag-iyahan sadto ni Don Jose Yusay ang duta sang Bagongbong. Apang sang ginpaidalum sa land reform, napanagtag na sa mga obrero sang hacienda ang mga duta, may ginpain ang Familia Yusay nga isa ka puna nga duta nga para lang gid sa eskuelahan.
Sulusobra lang sa one fourth sang hektariya ang kasangkaron nga duta sa medyo mabukid nga bahin Bagongbong ang ginpain nga pahamtangan sang eskuelahan.
May nagatindog gid man sadto nga isa ka hulot para sa mga bumulutho sang Grade 1 kag Grade 2 ugaling gubaon kabangdanan nga ginpangabay ni sadto Punong Barangay Elmer G. Dionio nga karon barangay kagawad na sang Bagongbong ang iya pakaisa nga si Henie Pareja-Campany nga buligan nga mapahamtagan sang school building ang ila mismo lugar agud indi na mabudlayan pa sa paglakat ang mga bata sa paglakat sang tatlo ka kilometro pakadto sa malapit nga eskuelahan sa Patag.
Mahapos nga nahaylo ang Amerikano nga si Ernest Campany, bana ni Henie Pareja, bangud nakita niya mismo ang mga bata nga wala nagaeskuela kag nagahampang lang. Ang iban sa ila naga-eskuela kon aga kag sa ila pagpauli sa udto, wala na nagabalik sa afternoon session.
Ginpangitaan sang medyos ang mag-asawa nga Campany, lunsay mga nurse sa America, nga makapatindog sang school buildings. Ang isahanon nga gubaon nga classroom nga ginpatindog sang Probinsya sang 2006 ginhimulatan nga mapahamtangan sang Familia Pareja kag Campany sang bag-o nga mga hulutklasehan nga karon kompleto na nga gina-occupy sang 126 ka bumulutho halin Kinder, Grade 1 tubtub Grade 6.
Ang pagtudlo sa mga schoolchildren sang Bagongbong kag kalapit nga mga mountain barangay sang Barotac Nuevo kag Anilao natigayon sa dedikasyon sang anum ka katapo nga teaching staff sang eskuelahan sa pagpamuno ni Teacher-in-Charge Alejandro B. Guavez, Jr.
Dako man ang nahimo sa suporta kag superbisyon ni Dr. Lalyn D. Quilantang, District Supervisor, sa pagpadihot nga may bastante nga teacher complementation ang eskuelahan.
Wala sang teacher item ang eskuelahan kag ang tanan nga anum ka manunudlo ginpangkuha lang sa ila mother unit kag gin-assign sa pagtudlo sa Bagongbong.
Ang teaching staff ginalakipan nanday Ginang Keith E. Belgira para sa kindergarten pupils, Nilmae B. Domingo sa Grade 1, Judith D. Coriana sa Grade 2, Grade 3 kag Grade 4 ginakaptan ni Sir Guavez nga amo man ang teacher-in-charge, Jessa B. Gumbao sa Grade 5 kag Grade 6 Teacher si Ma. Sofia R. Belgira.
Halos tanan nga mga manunudlo, indi tumandok apang nagbaton sang hangkat nga magpa-assign sa Bagongbong lamang nga mangin accessible ang kalidad nga edukasyon sa mga bata.
Kulang ang financial support sang panguluhan nasyunal kag local sa BAES, apang napangitaan man sang remedyo sang mga stakeholders – ang mga ginhikanan, komunidad sa pagpamuno sang mga opisyales sang barangay, kag DepEd. Apang dako gid ang nabulig sang Familia Pareja kag sang mag-asawa nga Ernie kag Henie Campany nga magluwas sa pagpatindog sang school buildings, nahuman man ang concrete fencing sa palibot sang eskuelahan sa ila solicitations sa mga abyan kag kakilala nga nakapagkit ang mga ngalan sini sa span sang kudal.
Ini’ng inyo alagad gin-agda nga mangin inspirational speaker sa labing una nga graduation exercise sang eskuelahan kag in turn na-inspire man sang dedikasyon kag handum sang mga stakeholders nagaseguro nga may makadtuan nga buluthuan ang mga bata sa naligwin nga barangay sa Bagongbong, Barotac Nuevo, Iloilo.
Next level na ang mga bumulutho sa B.A.E.S. Kontani mag-level up man ang suporta sa mga bumulutho nga mahatagan sang gahum o kusog (empower) paagi sa edukasyon./PN
