NAGPAKATIG-A pa sadto si City Administrator Hernando Galvez sa pagsiling nga indi na kinahangkan pa nga magkwa sang exemption gikan sa Commission on Elections (Comelec) para sa Pag-ulikid program sang city government.
Ginpanindugan niya nga sadtong nagliligad pa nga panahon, sadtong wala pa ang eleksyon nasuguran na ang programa kag indi na kinahanglan pa nga magpamangkot sa Comelec kag magkwa sang exemption.
Matigdas ang iya panindugan kag mabakog ang iya pagpati nga indi na kinahanglan ang exemption. Nagarason siya santu sa legalidad kag santu sa iya kaugalingon nga intrepretasyon sang kasuguan.
Kon pamatian mo siya, kaangay nga siya ang Comelec, kaangay nga siya ang kasuguan, kaangay nga siya lang ang nakahibalo maghangop sa kahulugan sang kasuguan.
Ang iya panindugan kag panan-awan ang ginlubag sang mas may otoridad kaysa sa iya, sang mas may ihibalo kaysa sa iya kag sa mismo nagapatuman sang mga patakaran ukon pagsulundan sa eleksyon.
Ginpanugyan sang Comelec 6 sa Iloilo City government nga mag-file sang petition for exemption sa election ban sang iya proyekto nga Pag-ulikid Program.
Mismo si Comelec acting regional director Jose Nick Mendros nagsiling nga ang ila law department nag-isyu sang opinyon nga ang programa ang sakop sang prohibisyon.
Dapat nga maghingyo ang city government sang specific authority gikan sa Comelec agud nga i-exempt ang programa sa ban tuhoy sa civil kag iban pa nga mga proyekto sa tion sang election campaign period.
Kaangay nga nagapamulugso lang ang city government ukon nagatuman nga supak ang buot rason nga naghingyo sila sang exemption apang indi sa porma sang petisyon kag sang nakalab-ot na sa law department sang Comelec ginpanugyan sa ila nga mag-apply sang petition for exemption.
Magluwas diri, isa sa mga rekomendasyon sang law department sang Comelec amo ang pagdumili sa mga pulitiko nga mag-upod sa caravan sang Pag-ulikid program.
Naga-upod kita sa maayo nga katuyuan sang programa. Kahibalo kita nga madamo na sang nabuligan kag madamo pa sang mabuilgan nga mga pumuluyo sang syudad. Indi dapat indi pag-untaton bisan pa sa panahon sang kampanya bangud pamaagi ini sang syudad nga madul-ong ang iya serbisyo sa lugar sang mga pumuluyo.
Apang bangud nga yara kita sa panahon sang kampanya kag ang tanan nga bagay dapat i-athagon naton sa Comelec nga amo ang may poder sa pag-interpretar sa tanan nga akto sang gobyerno kag sang mga opisyales.
Indi man mabuhinan ang kaalam sang isa ka tawo kon idangop niya sa Comelec ang isa ka bagay agud nga maathagan siya kag may balasehan siya sa pagbungat sang iya opinyon kag salandigan sa iya mangin akto.
Mas manami nga may athag nga pahayag ang Comelec agud nga malikaw ang city government sa malisya kag pagpatu-patu sang mga kasumpong sa pulitika. Mas nagakadapat ini kaysa sa maghaum-haum kag magtindog nga daw maalam nga ginayubit sang iban.
Kon nagahalong kita sa pagdumala sa gobyerno, dapat indi kita magmato-mato sa pag-interpretar sa mga bagay nga dapat ginasandig sa poder sang Comelec.
Mas matawhay ang panimuot kon may papel nga gina-uyatan gikan sa Comelec nga naga-athag sang tanan kag agud nga wala sang may ihaboy nga isyu ang nagapakamalaut sa city government. (bertladera@gmail.com/PN)
