MATUOD gid man bala nga may lamod sang pulitika ang tuyo nga pagdeklarar nga ipaidalom sa “state of calamity” ang syudad sang Iloilo bangud sa kakulang sang tubig?
Maathag nga may tinutuyo ang kada isa sa sini nga plano kag indi malipod nga may lamod sang pulitika bangud nga yara kita sa panahon sang kampanya kag makabentaha ang mga kandidato nga makauyat sang sini nga higayon agud nga mas malabawan ang ila mga kasumpong.
Indi na kita mag-ipokrito sa pagsiling nga wala sang pulitika kag ang tuyo lamang amo nga buligan ang mga nagaproblema sa tubig.
Antes kita magpuis kag magbasol sa kon sin-o ang sala, aton usisaon kon matuod gid man nga may problema sa tubig, kag kon nasunod ang mga proseso agud nga madeklarar ang “state of calamity.”
Dapat may resolusyon ang tagsa ka barangay nga apektado, nga nagasiling nga sila ang ginakulang sa tubig, agud mangin basehan sa pagduso sang tinutuyo.
Lantawon kon bala ang barangay nga natungdan may linya sang tubo sang MIWD ukon wala kag kon kinaandan na nga nagasag-ub sila sa iban nga lugar, nagabakal sa nagadul-ong nga trak ukon may bubon nga ginasaligan.
Matuod bala nga ginakulang sila sang tubig subong nga El Niño ukon bisan wala sang El Niño ang ila problema sa tubig ang wala nagatahaw?
Ang nagaduso nga mga konsehal may maayo nga tuyo nga mabuligan ang pumuluyo paagi sa paggamit sa kwarta sang banwa kag ang nagapamalabag may kaangay man nga tuyo apang luyag nga amligan ang kwarta sang banwa.
Mangin malawig ang diskurso, mangin huol nga magtimbang nga bahin ang pagtalakay sa sini nga sugilanon kag posible nga magdangat sa punto nga indi matigayon ang deklarasyon.
Indi na kita bag-o sa sini nga palaligban bangud sadtong 2007 nagdeklarar na ang “state of imminent calamity,” sang 2009 ang “state of water crisis,” kag sang 2015 ang “state of calamity.”
Kahibalo man ang tanan nga indi na bag-o ang problema sa El Niño. Sa tagsa ka mag-abot ini, ginaproblema naton ang tubig. Apang, madamo kita sang panahon nga makapreparar bangud temprano pa ginapaahibalo na ini sa aton sang PAGASA.
Dapat nga pangmalawig nga solusyon ang paminsaron sang syudad. Hingyuon ang MIWD nga palinyahan sang tubo ang mga barangay nga wala sang linya agud nga indi sila magproblema sa pag-agwada.
Imbis nga maggasto ang syudad sang hapin-hapin nga solusyon, paminsaron ang pangmalawig nga pagsabat sa problema. Indi lang sang nagligad kag subong ang problema sa El Niño, mahimo nga atubangon naton ila liwat sa palaabuton.
Kon sensiro sila sa paghatag sang solusyon sa problema, dapat ipatigayon ang linya sang tubo bilang solusyon kag indi ang deklarasyon.
Maathag man nga wala sang problema sa tubig suno sa MIWD kag ang mga barangay nga apektado kuno, sadto pa man, ang wala man sang linya sang tubo.
Kon matin-aw ang tubig, indi ini dapat nga kutawon agud indi maglubog kag agud indi mabudlay ang pagpangita sang solusyon. (bertladera@gmail.com/PN)
