GINAHANDOM sang mga kandidato nga itib-ong sila sang mga grupo sang relihiyoso agud nga mas mapapag-on pa gid ang ila kandidatura.
Kada isa sa ila ang nagapangita sang linyada ukon koneksyon. May mga emisaryo nga nagakadto agud nga magpanghimulso. May mga salaligan nga tawo nga naga-unay kag nagabantay sa gina-istoryahan sang mga lideres sang simbahan, grupo ukon organisasyon.
Kunsabagay, daku nga puntos kag magahatag sang bug-at sa kandidatura sang gin-endorso ang pagtib-ong sa iya sang mga relihiyoso. Makapalab-ot ini sang mensahe sa iya kasumpoong nga mas nagapag-on siya. Makapahuyang ini sa iya kasumpong sing makadali.
Apang may mga kasumpong nga kabigon ini nga hangkat kag ipadayon ang paghimakas nga makaganyat sang mga botante apisar nga wala siya gintib-ong sang mga relihiyoso.
Para sa kandidato nga gin-endorso, makaapekto ini sa paminsaron kag balatyagon sang iya kasumpong.
Apang, indi man magpaapekto diri ang kasumpong sang gin-endorso. Nagapati ang kadamuan nga indi man makadikta ang simbahan ukon grupo sang mga relihiyoso sa mangin resulta sang eleksyon.
Matuod gid man nga wala sang maathag kag direkta nga epekto ini sa kandidatura sa ila gin-endorso.
Kon matuod nga epektibo kag makaapekto sa kandidatura ang ila pag-endorso, kuntani wala na lang nagkampanya ang mga kandidato. Kuntani didto na lang sila nagsimba sa grupo sang mga relihiyoso. Kuntani ang ila ginabayad sa mga pasayod ang ila na lang ginhatag sa mga lideres agud nga indi na sila pagkapuyan sa paglibot sa lugar nga ila nasakupan.
Sa mga wala na-endorso, indi kamo magpaluya. Wala kamo sang dapat kabalak-an. Wala kamo sang dapat ikalingkang.
Kahibalo ang tanan nga madamo na sang gin-endorso ang Inglesia Ni Cristo (INC), ang Dios Gugma, kag iban pa, bisan pa ang simbahan katoliko, apang wala man sang kasiguruhan ang ila kadalag-an.
Madamo sang gin-endorso nga wala nagdaug. May mga kilala ako, nga indi ko na lang pag-imitlang, nga ginpasaligan gid nga ila hatagan sang suporta apang napaslawan sa resulta.
May mga kandidato man nga wala nila gin-endorso apang nakalampuwas man sa adlaw sa paghukom sang mga botante kag nagpangibabaw, nakaagom sang kadalag-an labaw sa mga ginpang-endorso.
Maathag nga indi nila nila nga nasakupan ang nagasunod sa ila lider kag sa ginatugpo sang ila organisasyon ukon asosasyon.
May yara sang nagalisa bangud nga ginasugo sang ila konsensya. May nagasupak bangud mas nagapangibabaw sa ila ang maayo nga pagtamdanay kag kaantanan sa kandidato nga ila nahamut-an.
Indi tanan nga gina-endorso ang ila gina-updan bangud mas ila nakilala ang kandidato kaysa sa mga lider nila nga naga-endorso.
Mahimo nga ang mga lider sang grupo ang nabulagan lang sa kon ano nga pasaburno nga ginahatag sa ila, basi nahaylo lang sang mga nagahutik sa ila rason nga wala sila nakamulalong sa mantsa nga napagkit sa ngalan sang ila ginatib-ong.
Mas kilala sang botante ang ila kandidato nga ginaboto kaysa sa endorso sang ila mga lideres sa ila grupo.
Wala sang lubos nga gahum ang mga lideres sang mga relihiyo nga diktahan ang ila mga nasakupan agud tumanon ang ila kagustuhan.
Mas gamhanan ang nagaboto kaysa sa endorso sang mga relihiyoso nga grupo. ((bertladera@gmail.com/PN)
