HALOS perpekto kag tuman ka-accurate ang 2019 midterm elections. Ini ang naggwa sa Random Manual Audit (RMA) Committee sang Commission on Elections (Comelec) sadtong Huwebes.
Sa report, may 99 percent accuracy rate ang 2019 elections gamit ang Automated Elections System (AES). Ini ang pinakamataas sa apat ka nakaligad nga nationwide automated elections.
Sa ginhimo nga RMA gikan sa 711 sang kabug-usan nga 715 ka clustered precincts nga nagabug-os sang 246 ka legislative districts nakita nga may kabug-usan nga accuracy rate ini nga 99.9953 percent, mas mataas ini sa 99.9747 percent sang 2013 mid-term elections, kag sa nakaligad nga duha ka-presidential elections nga may 99.9027 sadtong 2016; kag 99.5980 percent sang 2010.
Ginpakita man sini ang mataas nga accuracy rate sa senatorial votes nga may 99.9971 percent; House of Representatives may 99.9946 percent; kag boto para sa pagkamayor nga 99.9941 percent.
Sa tanan nga rehiyon ang Zamboanga Peninsula kag Caraga regions ang may 100 percent accuracy rate.
Ginabase ang accuracy rate sa variances ukon diperensya sa tunga sang naisip nga boto sang voting machines kag manual count.
Ini nga mga data, kun patihan naton ang Commission on Elections (Comelec), wala sang isyu sang vote padding kag shaving ukon mga wala naisip nga boto. Gina-contradict man sini ang mga pahayag ni Presidente Rodrigo Duterte nga palpak ang vote counting machines sang Smartmatic gani dapat na nga ilisan ang sistema.
Ang masadya karon kay may mga nalutos nga kandidato nga gusto magpa-recount sang manual kay nagapati sila nga gindyaan sila kag madamo ang ila boto nga wala naisip sang makina. Syempre indi dira maulihi ang protesta ni defeated Iloilo gubernatorial candidate Dr. Ferj Biron kontra kay Governor- elect Arthur “Toto” Defensor Jr.
Siling sang protesta ni Biron wala nagsanto ang resulta sang election sa resulta sang isa ka-survey firm nga sya ang nagdaug. Gusto man makita ni Biron kun diin nag-adto ang halos isa kagatos kalibo nga boto nga wala naisip. Labaw sa tanan may isyu kuno sang pagpamahog kag pamakal sang boto.
Sa banwa sang Calinog nagprotesta man ang nalutos sang kandidato sa pagkaalkalde. Maisog sya magprotesta apisar nga ikatatlo sya bangud gamay lang ang abanse. Sa banwa sang Concepcion amo man ang natabu. Ang ginabanta nga linibo nga abanse sang magtimbang nga kampo nahulog lang sa gatos gani ang nalutos nagprotesta.
Kun basehan naton ang resulta sang RMA sang Comelec wala kita sang rason nga mag-question sang resulta sang election kay halos perfect gani. Pero ila man ina sang Comelec nga pahayag kag lihok. Wala man ina nagapugong sa mga tawo nga magpangita sang hustisya kun pamatyagan nila gindingutan sila sini.
Kun sa bagay diri sa Pilipinas wala sang nalutos nga kandidato, kundi gindayaan lang. Wala sang nagdaug nga kandidato kundi nangdaya lang agud maangkon ang posisyon./PN
