TUMAN ka init ang bayluhanay sang mga sugilanon sa social media.
Ang mga supporters sang administrasyon pareho ang habuyanay sang lunang. Bisan ang mga tawo nga apolitical kag wala sang ginaapinan, dalahigon pa sang mga nabapabor ukon kontra sa administrasyon.
Ang kaladlawan kay maisog pa mamangkot kun sin-o gid bala ang iban. Kun tani pinamangkot nila anay ang ila kaugalingon kun sin-o gid sila nga mag-question sang opinion sang iban.
Ang Pilipinas lugar sang mga hilway. Hilway kita nga magpautwas sang atun ginabatyag kag panan-awan sa mga isyu kag hitabu sa atun palibot. Ang problema kay ang iban abi nila ginapanag-iyahan nila ang kinaalam kag sila lang ang matarong. Kun magpautwas ka sang imo panindugan nga indi santo sa ila panan-awan, pagkabig nila sa imo sungayan.
Pero ang pamangkot diri, sin-o ka bala? Sin-o ako? Sin-o gid kita tanan? Pareho man lang kita nga outsider sa gobyerno pero ngaa daw mas matarong ka imo kun pahambalon? Kaangay lang nga ikaw ang husto nga nagausoy sang katarungan samtang ang iban wala sang matarong.
Ngaa bala amo na lang sini ang pagpuroyag-it sang iban? Dapat nila paminsaron nga mentras may nagapanindugan sa pihak nga kudal, palatandaan ina sang kahilwayan sang pungsod.
Sa malawig nga panahon ang katapo sang media ang nangin salandigan sang mga ginapigos. Ang katapo sang media nangin doktor, abogado, social worker, relationship counselor kag kun anu-ano pa nga papel ang trungdan lamang mapangalagaran ang nagakinahanglan. Apang subong nga may social media na, daw ang netizens na lang ang husto.
Sa matuod tuman ka kulolbaan ang sini nga sitwasyon. Kun sa media mahimo mo sya lagson sa iya kasal-anan, ang sa social media makatalagam. Tanan na lang media na. Pero ang mapasalig lang sang mainstream media kun ano man ang ila kapaltahan ukon kakulangan, handa sila nga sabton kag mangin responsable.
Sa tunga sining kahangawa sa 2019 novelcronavirus – Acute Respiratory Disease (2019 nCoV-ARD) indi inaway sa social media ang sabat. Indi man dapat nga manasig lang paggwa sang panan-awan kun ano ini nga sakit, paano ini makalaton kag kun anu-ano pa. Sin-o kita? Indi kita doktor.
Bisan doktor ka pa, ang Department of Health lang ang opisyal nga makapaggwa sang ano man nga pahayag angut sa 2019 nCoV-ARD. Gani kun ahaw man lang nga post, like, copy paste, share kag react ang imo nabal-an, indi ka magpinagusto share sang impormasyon nga bisan ikaw wal a man gani nakabasa sang bug-os ukon nakahangop sang kaundan.
Labi sa tanan, antes ka mag-post, basaha sang husto ang imo i-post. Ini agud nga ang “is” kag “are” pati na si “to” plus verb mo nagasanto ang tenses.
Sin-o gid bala kita nga magmangin-alamon sa sini nga isyu? Observer lang kita gani mas makapaayo nga kun wala ka man lang sang ginabatyag, maghipos. Kun nakalagaw ka, maghugas gid sang kamot kag indi pagtandugon ang baba, mata kag ilong kun wala nakapahinaw. Sa sina, makabulig ka pa sa gobyerno mo kag indi ka magdugang sa problema.
Buot silingon, indi ka magpaalam-alam kay sa matuod lang, maathag man nga hangag ka sa imo panindugan!
Bisan ako guilty man sini kun kaisa! (jpranco1975@gmail.com/PN)
