GABAHA ang kamanguan kag kalangkaan sa social media bangud sang ila tagsa-tagsa ka ginapatihan.
Mapagobyerno man ukon oposisyon ang ginasakdag, nagaminango kag nagalinangka na sa pagdepensa.
Kuntani wala ‘ni ‘ya labot ang prutas. Ambot ngaa ginadalahig pa sila sa pagbinatasan sang tawo.
Subong nga moderno na ang panahon, tanan na mangin-alamon. Ugaling sa sobra nga paalam-alam, nakita ang kamanguan. Indi ko matakos kun diin nagakuha sang kaisog ang mga tawo nga napun-an sang kahangagan nga magpabutyag sang ila panindugan sa isyu nga wala man sang balasehan kundi kun ano ang ila ginapatihan kag ginasakdag nga talapuanan.
Sa social media nagalinapta na ang isyu kontra sa administrasyon. Sang nag-init ang isyu sang nCoV-2019 kag karon ginatawag na nga COVID-19, masadya man ang habuyanay sang lunang sang mga pabor kag kontra sang administrasyon.
Subong nga nag-init ang isyu sang quo warranto kontra sa franchise sang ABS-CBN ara naman ang mga nagapaalam-alam. May ara gani nga indi makatadlong sang Ingles na pero ma-Ingles pa kun magkumento.
Sang nag lanog ang balita nga ang poster boy sang war on drugs sang Duterte administration ara gali sa drug list sang Presidente, nagawiliit naman ang baba sang iban sang depensa. Samtang ang media nagareport lang nga may “pagpangduha-duha” ang mga nagakumento napat-ud na nga indi matuod ang balita.
Pero sang ulihi ang balita sang Rappler nga ginpick-up sang mga lokal nga media, ginpamatud-an sang mga interviews sang iban pa gid nga national media. Mismo ang DILG (Department of Interior and Local Government) secretary nga si Eduardo Año ang nag-ako nga ara si Police Lieutenant Colonel Jovie Espenido sa drug list sang P presidente.
Teh karon kay may nagkumpermar, ano ang inyo reaksyon?
Kun matuod man kun indi ang kaangtanan sa droga ni Espenido, indi ini ang matuod nga isyu. Bangud mahimo man lang malakip ang ngalan sang bisan sin-o kun gustuhon sang gobyerno. Ang paglista mahapos lang pero ang pagpamatuod sang akusasyon, tuhay naman nga sugilanon.
Gani sa sini nga sitwasyon, abi kun abogado ka mag-akto ka man nga abogado. Indi ka maglinangka kag minango. Kay sa dalayun mas angayan ka na mangin mango kag langka sang sa mag-abogado.
Normal lang nga ang tagsa sa atun may panindugan. Apang dapat ini tanan may sadsaran nga kamatuuran kag wala nabalay sa kun ano ang atun ginadampigan sa isyu sang politika. Paandara ang utok indi ang balatyagon agud makahimo ka sang maalam nga desisyon!
Indi mag minango kag linangka! (jpranco1975@gmail.com/PN)
