NAPAMATUD-AN sa makapila ka beses nga ang kalmante nga panimuot amo ang nagatindog sing mapag-on sa tunga sang krisis ukon daku nga palaligban.
Mas makapaminsar sang solusyon ang kalmante nga panimuot kag mas epektibo nga makahiwat sang pamaagi agud mapahagan-hagan ang epekto sang ginapangatubang nga palaligban.
Makita naton ang personalidad sang mga lider sa syudad kag probinsya sang Iloilo sa kon paano nila ginaatubang ang daku nga palaligban dala sang covid-19 pandemic.
Mas masupog kag nagapangaway si Iloilo City Mayor Jerry Treñas agud nga mapangapinan ang mga pumuluyo sang syudad kag indi malatnan sang covid-19.
Ini ang makita nga diskarte niya kon sa diin may mga inisyatibo siya nga ginahimo nga nangin salandigan man sa pag-akto sang iban nga local chief executives kag ila ginasunod sa pagpati nga epektibo ini sa pagpangapin sa ila nasakupan.
Ginadayaw sang kadamuan ang mga padugi nga gina-obra ni Iloilo City Mayor Jerry Treñas para sa pumuluyo kag sa nasakupan nga lugar.
Nangin pampaganyat man ini sa mga pribado nga sektor nga magbuylog sa iya kawsa rason nga madamo man sang donasyon nga naga-abot kag ginaduhol sa syudad sang Iloilo.
Gin-aku man sini nga kon kaisa nagasayop siya sa paghimo sang desisyon. Ginpakamalaut ang pagpahanugot sini nga makapauli ang isa ka covid-19 positive gikan sa Manila nga anak sang iya suod nga tagsakdag kag legal officer sang syudad.
May mga bagay siya nga ginhimo nga nagtap-ing sa iya determinasyon kag sinseridad. Nagbuhin ang paghangad sang iban nga tawo bangud sa indi patas nga pagtalupangod sa pumuluyo. Nag-alburuto ang iban nga mga himata sang Overseas Filipino Workers.
Masami man ang iya pagpamuyayaw sadto sa mga national government agency nga nagtuga sang kabalaka sa iban nga mga empleyado sang gobyerno.
May nagasiling nga daw ang alkalde na lang ang nakahibalo sa pagpangita sang solusyon kag siya lang ang maalam sa pag-atubang sa problema.
Naga-ibwal kag tuman ka singkal ang akto kag tinaga sang alkalde nga nagpa-atras sa iban nga kaangay niya nga tag-alagad sa gobyerno, nagalikaw sila nga indi masunog sa mga tinaga.
Masakit pamatian kon kaisa nga may pagpanurasok nga nagakawas sa iya baba kag ginabunalan sini ang mga ahensya sang gobyerno. Posible bangud man sa iya kaugot kag ka-desperado sa nagakatabu sa iya palibot.
Kada isa may diskarte apang ang nagamadinalag-on amo ang mas kalmante.
Matalupangdan ini sa pamaagi ni Governor Toto Defensor nga tuman ka bugnaw ang paghambal, malagday, kag wala sang kasingki ang mga tinaga.
Kaangay siya sang mabugaw nga tubig nga ginabasya sa naga-ibwal nga kalayo. Mas maayo kon sa mga pagsinapol yara siya sa luyo ni Iloilo City Mayor Jerry Treñas bangud kahibalo siya magsapar agud mapalong ang kainit sang balatyagon.
Wala ka sang may mabatian nga pagpamasol ukon masingki nga pagpanurasok gikan sa baba sang gobernador.
Mas napabilin sini ang pagka-kalmante sa tunga sang daku nga problema. Mas nakita sini ang mga alternatibo nga hilikuton sa kon paano solbaron ang problema.
Mas masangkad ang iya paglantaw sa mga posibilidad sa kon paano solusyunan ang isa ka palaligban antes magtuhaw bilang isa ka daku nga problema.
Mas kampante ang probinsya sang Iloilo sa kadaku sang iya pondo nga isabat sa pagkinahanglan sang pumuluyo. May yara man sang nagadonar sa probinsya apang indi tuman ka damo kon ipaanggid sa ginabaton nga donasyon sang syudad.
Kag bangud kalmante ang pinsar sa pagpangita sang solusyon, natalupangdan sang DILG-6 ang maayo nga buluhaton sang probinsya.
Ginpabugal sang DILG-6 ang “Pag-ulikid sa Mangunguma” ukon ang relief assistance program sang Iloilo provincial government bilang LGU COVID-19 Best Practices in Region 6.
Ginlunsar ang programa sa pagsustenir sa lokal nga ekonomiya paagi sa paghatag sang palangitan-an sa mga lokal nga mangunguma kag kadungan ang paghatag sang relief assistance sa mga komunidad nga napaidalom sa enhanced community quarantine.
Nagpain ang probinsya sang 8.7 million pesos agud ibakal sa agricultural products sang mga magagmay nga mangunguma kag ang mga produkto amo naman ang ginapanagtag sa mga panimalay.
Indi kinahanglan ang mainit nga balatyagon, indi kinahanglan ang magpangturasok, indi kinahanglan ang magpamuyayaw, indi kinahanglan ang magpaalam-alam agud nga masolusyunan ang daku nga palaligban.
Mas madamo sang posibilidad nga makita ang bukas ang panan-awan agud ang problema masolusyunan nga wala sang balatyagon nga mapilasan.
Sa masingkal nga sitwasyon, dapat ipabilin ang kalmante nga paminsaron agud makabungat sang mabugnaw nga tinaga nga may tono sang pag-angga. (bertladera@gmail.com/PN)
