ANG enrolment sa school year 2020-2021 sa public kag private schools nagsugod na sadtong Hunyo 1, samtang ginatalana man ang klase sa hayskul, elementarya, kindergarten kag pre-school sa Agosto 24, 2020.
May schedule man ang Higher Education sa idalom sang CHED. Ugaling, hibaluan pa naton ini.
Tungod sa pagpamahog gihapon sang Covid-19, wala sing face-to-face (F2F) nga pagpa-enrol. Himuon lang ini online, paagi sa telefono, ukon sa iban pa nga paagi nga itugyan sang Dept. of Education.
Sa pag-enrol, ginatagaan sing choice ang estudyante kon ano ang maluyagan sini nga mode sang pagtuon. Blended bala – online kag home work sa puluy-an? Ukon lubos nga online, lubos nga home work sa puluy-an, ukon sa ano pa nga paagi nga mapanugyan sang DepEd.
Ipatuman man sang DepEd – labi na gid sa hayskul – ang Modular Curriculum sa diin ang estudyante may malawak nga opportunidad sa pagpili sang iya “program of study” nga bagay sa iya interes, kag ginapakita nga skills kag competence, katulad sang aptitude sa entrepreneurship kag iban pa nga specialization (modular courses) agud mas epektibo sa ulihi nga worker sa sosyedad.
Ginapasanyog man sini ang Independent Learning, sa diin ang konsentrasyon amo ang student-subject matter connectivity kag less sa tunga sang estudyante kag manunudlo.
Indi ko ugaling lubos ma-imagine kon paano ining modular courses ipatuman sang DepEd tungod wala man ini sing paathag. Segurado ko lang nga ang kadam-an magapili sang Home Schooling kag indi F2F sa classroom agud likawan ang Covid-19.
***
Nonetheless, tagaan ta kamo sang ideya kon paano ko sadto ginpatuman ang Independent Learning nga bahin sang Modern Education nga naabtan ko sa akon panahon bilang estudyante kag manunudlo sang ulihi sa hayskul sa University of Iloilo kag, sang ulihi, sa Iloilo City (Molo) National High School bag-o ako nagsaylo sing interes sa pangabuhi.
Sa Modern Education nga ginapatuman na sadto, ang pagtudlo natutok sa mga konsepto sang Discovery Learning, Critical Thinking, kag Independent Learning, nga amo man ang mayor nga goal sang Modular Education sa karon.
Major specialization ko ang Math kag Geometry ang akon ginatudlo sa Molo High. Mabudlay gid man ang Math sa kabataan, labi na gid sa lower sections sa diin ang mas mahina man ang gatupa diri. Na-assign ako sa sections 12-15.
Nangin mas interesante na ang pagtuon sang mga kabataan sa Discovery Learning. Napalawak man ang Critical Thinking nila paagi sa combined inductive kag deductive reasoning, nga ginapahapos pa sang konsepto sang sets, subsets kag universal set.
Ang problema ko na lang amo kon paano itudlo ang Independent Learning sa kabataan, nga nagahatag emphasis sa student-subject matter connectivity.
Una gid, ginpatuon ko anay ang akon estudyante sa kwarto sa isa ka tsapter sang student edition nga libro. Sadtong panahon indi makahatag ang eskwelahan sang libro sa kada estudyante. At best, tunga lang sang klase. So, ginapa-share ko ang duha sa isa ka libro.
Dayon gwa ko sa kwarto sa sulod sang mga 20 minutes sang 40 minutes nga klase, kag magbalik. Ipasara ang libro kag tagaan sing test sa ila gintun-an. Tsekan ang ila ubra kag ipahibalo ang resulta sa ila nga may upod nga grado, samtang ginaupdan ini sang paathag ang resulta.
Sa mga mas mahina (unfortunately, tanan gid sila), ang ginahatag ko amo ang sample problems. Ginapatun-an sa ila sa kwarto. Dason tagaan sila sing test, kon indi dayon sa masunod pa nga adlaw. Ining test amo-amo man sa sample problems nga ginaligwat lang ang mga detalye nga madale na nila ma-answeran.
Daw wala man gani kinalis ining pagtudlo ko sa classroom, nga amo man gihapon seguro ang ginahimo sang karon nga mga manunudlo, sa pagpatudlo sang Modular Education sa karon sa sulod lang sang puluy-an sang estudyante.
Pwede man gihapon magkilalahay kag magsugilanon ang estudyante kag ang manunudlo paagi sa celfone nga kaugalingon ukon ginhulaman, ukon makaduaw man si ma’am ukon si sir sa importante nga kahigayunan.
In fact, indi gid man problema ang home schooling tungod Independent Learning man ang ginapatuman kag kumpleto man sing instructional materials ang mga estudyante.
May bentaha pa gani ini sa estudyante tungod makatuon siya kon san-o luyag niya magtuon – sa aga, hapon ukon bisan sa gab-i pa./PN
