WALA kita natingala kon ngaa gustuhon sang mga pumuluyo nga ipabilin ang frankisa sang ABS-CBN kag ipadayon ang pagpagwa sang iya mga programa sa ila mga puluy-an.
Ang resulta sang survey sang Social Weather Station (SWS) nga ginpagwa sini sadtong Hulyo 11 nagasiling nga 75 porsyento sang mga pumuluyo luyag i-renew ang frankisa sang ABS-CBN agud makita nila liwat ang mga matahum nga mga programa sini sa TV.
Sa isa gani ka survey sang isa ka lokal nga radyo, ang tanan nga nag-react nagpahayag nga luyag gid nila nga i-renew ang frankisa sang ABS-CBN.
Ginakahidlawan nila gihapon ang paborito nila nga mga programa dira kag ginakasubo nga nauntat ini. Naluoy man sila sa mga 11,000 ka empleyado sini nga nawad-an sing trabaho.
Ginapasalamatan pa gani nila ang mga kaayuhan nga nahatag sini sa mga pumuluyo, katulad sang 163 Foundation nga nagabulig sa mga kabataan kag ang wala puknat nga pagbulig sa mga nalisdan sa bagyo kag bisan sa sining pagpamintas sang Covid-19.
Wala gani nila ginasapak ang akusasyon ni Presidente Duterte kag sang iya mga kaalyado sa pulitika batok sa ABS-CBN.
Ina tungod ang nakita lang nila amo ang kaayuhan nga nahimo sini, labi na gid kay wala man sing may napamatud-an sa mga akusasyon batok diri, nga ginpanginwala man gani sang ABS-CBN.
Nagagwa gani nga ang pagpamatok nila sa ABS-CBN bunga lang sang ila interes personal kag interes sa pulitika nga natapakan sang ABS-CBN sa obligasyon sini agud dampigan ang Demokrasya, labi na gid ang pagpasanyog sang Freedom of Speech sang mga pumuluyo, Freedom of Expression sang mga manunulat kag mga artista, kag sang Free Press sang aton mga mamahayag.
Essentially, ang paghatag sang frankisa sa ABS-CBN, katulad sa iban nga public utilities katulad sa elektrisidad kag tubig, ina tungod sa ikasarang kag katutom sini sa pagserbisyo sa mga pumuluyo kag indi kon sa ano pa nga rason.
Kon may lagas dira ang gobyerno sa ila, ina tungod sa palpak sini nga pagserbisyo sa mga pumuluyo. Apang kon wala man lang ining reklamo nila, binuang ina ya nga lagson ini sang gobyerno.
Lagson mo ang isa ka public utility nga nagahimo sing kaayuhan sa mga pumuluyo tungod lang sa interes personal kag interes sa pulitika? Indi amo ina ang rason, kundi kon bala gaserbisyo ini sing maayo ukon indi sa pumuluyo.
Apang testigo ang mga pumuluyo nga naluyagan nila ang serbisyo sang ABS-CBN sa ila kag sa Demokrasya nga ginsumpaan ta nga klase sang pagpangabuhi sa aton Konstitusyon.
Kon may dapat masaway ang gobyerno sa ABS-CBN amo lang kon nagpalpak ini sa pagserbisyo sa mga pumuluyo. Pero wala, kay naluyagan pa gani sini ang pagserbisyo sini.
Kon may ara gid man nga masaway ang gobyerno ina lang kon may nalabag ini nga kasuguan. Apang wala man, kay wala man gani may napamatud-an nga kasal-anan ini. Puro man lang pagmulay sa kuno “bias” ang ABS-CBN sa ila.
***
Aba, natural lang nga “bias” ang ano man nga media institution batok sa pang-abuso kag korapsyon sa gobyerno kag ang pagbale-wala sini sa kinamatarong sang mga pumuluyo sa aton Demokrasya, nga dapat tani nila respetuhon.
Siling gani ni French philosopher nga si Voltaire, nga naghatag inspirasyon sa pagtukod sang Konstitusyon sang Estados Unidos, nga aton man ginasunod: “I may not like what you say against me, but I will defend to death your right to say it!”
Ginpanindugan man ni Voltaire ang Freedom of Religion kag Separation of Church and State, nga ginasunod man sang konstitusyon sang Estados Unidos kag sang aton man konstitusyon.
Siling man ni Abraham Lincoln: “A government of the people, by the people and for the people,” indi bala? Indi kay “a government by the government against the people”.
In fact, panindugan man ini sang mga tapos sa Philippine Military Academy kag PNPA kag sang mga military academy sa Estados Unidos nga na-train sa Demokrasya.
Panindugan ta man ang Bill of Rights sa aton Demokrasya nga nagadampig sa wala pinilian nga kinamatarong sang tanan, inosente man siya ukon akusado sang krimen.
Tani indi pagkalimtan ini sang aton mga opisyales sa gobyerno. Otherwise, gobyerno kita sang oligarkiya sang nagagahum sa gobyerno. Nga kaaway sang aton Demokrasya!/PN
