ISA KA senior citizen (60 anyos ang edad paibabaw), nga katulad naton, ang nagreklamo batok sa isa ka tinawo sang security agency nga nagabantay sa ganhaaan sang Gaisano Capital nga mall sa La Paz sadtong ugto sang Lunes, Agosto 10.
Ginhingadlan ang sekyu nga si Lozada nga ginpabugal gid ang iya agency nga MD Force.
Bag-o lang si senior citizen kasulod sa isa ka bangko agud mag-withdraw sang madumduman niya nga manugtomar na gali siya sang iya maintenance nga bulong sa high blood sinang ugto.
Gani dale-dale siya nga nagpadulong sa Gaisano Capital sa La Paz nga malapit sa iya agud magbakal sa botika dira sa sulod.
Apang ginpunggan siya ni sekyu Lozada sang mahibal-an nga isa siya ka senior citizen. May upod ini sang isa pa ka sekyu sang iya agency sa ganhaan sang mall.
“Sorry, indi ka pwede makasulod,” siling sini nga may gintudlo nga kon ano nga aviso sa ganhaan nga kuno nagadumili sa tigulang sa pagsulod sa mall.
Natingala si senior citizen kay nakasulod siya gani sa bangko bag-o lang nga wala sing problema.
Ginsiling niya ini sa kay sekyu, apang namilit gid ini nga indi pasudlon si lolo.
Gindugang pa siling ni sekyu nga “private” ining establishment sang Gaisano. Aba, paano nangin “private” ang isa ka mall kay pam-publiko ini? Ini nga daan nagapatimaan nga ignorante ang ining sekyu sa dapat niya hibaluon sa iya trabaho.
Gintudlo lang sini sa tigulang nga may pagka-arogante kon diin ini pwede makabakal sang bulong sa tabuk sang dalan nga indi man niya ma-specify.
Kita man gani indi makatudlo sa botika nga malapit dira.
Naggwa si senior citizen kag nangayo sing pagpaathag sa isa ka pulis nga nagabantay man sa gwa sang mall malapit man lang sa ganhaan sang mall kon diin nagabantay si sekyu Lozada.
Masubo ugaling kay nanginwala man ang pulis sa pagbulig. Siling niya: “Obligasyon ina sang security…”
So, agud indi maalang-alang ang iya pagtomar sang bulong, naghingagaw na gid lang si senior citzen sa pagsakay sa taksi pauli.
“Pwede gani magbakal bulong didto sa Iloilo Supermart kag sa bangko, ngaa abe indi pwede diri sa Gaisano Capital,” kumod sini samtang nagapalayo.
Apang nagsiling ini nga paylan nya sing kaso ang sekyu kag ang agency sini nga MD Force. Pahibaluon man niya kuno ang Gaisano management parti sini.
Delikado ang malipatan mo ang imo bulong nga may talana nga oras kay mabalik na sina ang imo ginabatyag sa paglampuwas sang epekto sang bulong, labi na gid kon mataas ang imo high blood pressure ukon nakaagi ka stroke.
***
Sang matabo ini sa tigulang, sa kategoriya nga General Community Quarantine (GCQ) ang siyudad. Husto bala ining ginapapati sa iya sang sekyu nga indi siya pwede makabakal sing bulong sa Gaisano Capital sa Lapaz tungod senior citizen siya?
Nag-research kita diutay kag ini ang aton nadiskubrihan.
May Executive Order parti sina. Ining Executive Order amo ang EO No. 112 nga, upod sa IATF Resolution No. 30, dated June 1, s. 2020, nagasiling sa isa ka bahin sini sing: “Not Allowed, with Exceptions. .Persons aged below 21 years, 60 years and above, immunodeficient, with comorbidities, or pregnant are not allowed to go out except when going out for essentials.”.
In other words, sa aton pulong nga Hiligaynon, pwede makagwa si senior citizen agud magbakal sang iya bulong dira sa sulod sang Gaisano Capital sa Lapaz, katulad sang ginahimo ko man kon kinahanglan ko magbakal sang bulong kon wala ako sing malihog.
In other words man, sala atong tindug ni sekyu Lozada nga indi makasulod si senior citizen agud magbakal sang iya bulong dira.
Kon sadto nakabatyag na si senior citizen sing senyales, katulad sang panghugot na sang iya liig, may delikado na ini kon ma-delay pa ang pagtomar sini sang iya bulong.
Maayo lang kon wala sing may natabo sa senior citizen tungod sa delay nga indi siya makatomar sang iya bulong. Kon may natabo, pwede si sekyu, kag ang iya security agency, maakusahan kag manabat. In fact, bisan wala sing natabo kay old.
Indi bala, Attorney? Kag, ano naman ang masiling sang OSCA agud tadlungon ining pagka-ignorante sang sekyu nga nagabantay sa ganhaan sang Gaisano Capital sa La Paz?/PN
