UNLESS maglisu naman ang panghun-huna sang powers-that-be – nga kon kis-a gulpyada lang kag makakilibut – yara na ang siyudad sang Iloilo sugod sining Setyembre 2020 sa idalom sang Modified General Community Quarantine (MGCQ) nga mas maluag-luag sangsa GCQ nga yara kita sadtong nagligad nga bulan.
Sa kabug-usan, sunu sa IATF Omnibus Guidelines on the Implementation of Community Quarantine in the Philippines nga ginpatuman sini sadtong Mayo 22, 2020, ang tanan nga pumuluyo sa siyudad sang Iloilo pwede na makagwa sa ila mga puluy-an.
Ugaling lang, dapat gihapon sundon ang minimum health standards, katulad sang paggamit sang face mask (lakip na sa karon ang face shield), ang physical distancing kag ang pila ka limitasyon sa mga aktibidades nga pwede ipatuman sang siyudad paagi sa igapagwa ni Mayor Jerry Treñas nga Executive Order.
Tani mangin responsable kita nga mga pumuluyo sa pagtuman sang sining bagay nga health protocols.
***
Samtang gainit ang tension sa tunga sang United States kag China, madamo ang nagakahadlok kon mag-allout war na gid sila.
Ina tungod pareho ini sila nga mga nuclear power, nga may mga armas nuclear nga, sa nahibal-an naton makapatay sang madamo sa isa lang ka lupok.
Matandaan naton ang paghulog sang atomic (nuclear) bomb sadtong Agosto 6 kag 9, 1945 sa Hiroshima kag Nagasaki, Japan.
Sa pagkaligad sang apat ka bulan sang matabo ato, ang isip sang napatay sa Hiroshima naglab-ut sa 90,000 tubtub 146,000 ka tawo kag mga 39,000 tubtub 80,000 sa Nagasaki.
Napatay ini sila sa direkta nga pagtupa sang atomic bomb kag sa padayon nga pagluntad sang makamamatay nga atomic radiation. Ang iban nga nabuhi nangin inutil tubtub buhi. Indi man mapuslan ang lugar nga naigu sang bomba.
Kag ini tungod sang una pa lang nahimo nga atomic bomb nga ginhulog sang US sa kaaway sini sadto nga pungsod sang Japan!
Sa karon, sa padayon nga pag-testing sang US, sunod sang Rusya pati na sang China, may mas mabaskug na nga mga nuclear bomb nga nahimo.
Lakip diri ang hydrogen bomb kag ang neutron bomb, nga ginsiling nga ma-testingan lang sa “space” sa gwa sang kalibutan tungod sang tuman pagkamahaliton sini.
Tungod sini, sin-o man abe ang indi mahadlukan kon matabo ang all-out nuclear war sa tunga sa sining dalagku nga mga pungsod?
Aba, amo na ina seguro ang katapusan sang kadam-an sa aton nga indi makapanagu sa mga nuclear shelters sang sining dalagku nga mga pungsod.
In fact, basi ang gwa sang katauhan mangin katulad sang mga dinosaur nga napatay sang gin-ulanan sila sang madamo nga mga meteor halin sa kahawaan. Ukon tungod sa isa ka pandemic nga nag-igu sa ila.
***
Well, nagapati kita nga indi pa matabo ang The Great Tribulation ukon ang Last Judgment, nga gina-predict sang iban, kon san-o maguba na ang kalibutan kag ang magabangon nga mga patay tagaan na sang Diyos sang Iya final nga paghusga kag ibulag na ang mga Maayo kag ang mga Malain tubtub sa katubtuban.
So, ang matabo seguro nga ang magaluntad anay ang pagbalik sang cold war – “a state of political hostility and military tension between two countries or power blocs, involving propaganda, subversion, threats, economic sanctions, and other measures short of open warfare” – katulad sang natabo sa tunga sang United States kag Russia pagkatapos sang 2nd World War.
Meantime, sige gihapon ang pagtuon kag pagpabakud sang mga defense system sang mga indi mag-intiendihanay nga mga pungsod.
Aton-aton lang ini, pero may naisipan kita nga solusyon agud indi matabo ang 3rd World war nga gamit ang mga armas nuclear katulad sang mga ballistic missile nga may nuclear warhead kag nuclear bombs halin sa kon diin nga launch pad – ground, underwater ukon sa kahanginan.
Ini amo ang pagka-diskubre sang defense system nga maka-pabalik sining nuclear weapons sa ila launch pad kag ang halitan amo mismo ang nagpalupad sini.
Kon matigayon ini, tan-awon ta abe kon may luyag pa maggamit sang nuclear weapons batok sa kaaway. Segurado mapilitan lang sila sa pagpatigayon sing conventional warfare kon mag-initay.
Gyera Patani lang bala kita! Wala lang gamitay nuclear nga armas, a. Kon pwede lang gani magkusianay lang kita. Indi bala Beautiful? Indi kay manupungol ka gid imo ya.
Okey?/PN
