SA NAKALIGAD nga duha ka adlaw, duha man ka sunod-sunod nga paghikog ang gin-report.
Ginbasol sang mga ginikanan ang kamatayun sini nga mga kabataan sa kabudlayan nga ginaatubang sa modular class.
Matuod mabudlay ang modular kay wala ka sang gilayun nga mapamangkutan kun may kabudlay nga ginaatubang. Ang matuod nga indi makasabat gilayun ang mga manunudlo bangud masako man sila sa paghanda sa masunod nga modular class.
Apang, matuod gid bala nga bangud lang sa kabudlay sa module, maghikog ang mga kabataan?
Indi man patas para sa ginikanan kag eskwelahan nga basulon sila sa sini nga hitabo. Ayhan antes ini ginhimo sang bata madamo na sang mga bagay nga nagtililingob na sa iya dughan gani nakahimo sya sa pag-utas sang iya kabuhi.
Ang problema sa pag-utas sang kabuhi bunga sang problema man sa paminsaron.Gani ini dapat padaluman sa pagtuon sang mga natungdan nga ahensya sang gobyerno.
Apang bilang isa ka ginikanan, wala man kita sang ikasangkol gid sa paghangop sang mental problem sang tawo, ini bata man ukon tigulang.
Apang bilang ubay sa atun tanan, santo sa World Health Organization may palatandaan kag sintomas nga posible magautas sang kabuhi ang isa ka tawo.
Ini nga mga pagbinatasan palatandaan nga posible may tuyo sila nga manginmatay.
1. Nagahambal nga gusto mapatay ukon gusto nga manginmatay.
2. Masami lang nagahambal nga wala na sang paglaum kag pulos ang kabuhi nga wala na sang rason pa nga magkabuhi.
3. Nagahimo sang plano ukon nagapangita sang pamaagi kun paano patyun ang kaugalingon kaangay sang pag-search online sang makatalagam nga pamaagi, pagbakal sang mga pills ukon armas.
4. Masami lang nagahambal sang dako nga paghinolsol kag kahuy-anan.
5. Pamatyagan nya nga nabilanggo na sya sa problema ukon wala na ini sang solusyon.
6. May nabatyagan nga sakit nga indi na mabatas.
7. Nagasiling nga palas-anon na lang sya sang iban.
8. Paggamit sang alokohol ukon druga.
9. Ginakulbaan kag indi mapahamtang.
10. Wala na nagapakig-upod sa mga pamilya kag abyan.
11. May pagbag-o na sa iya kinaandan nga pagkaon ukon pagtulog.
12. May kaakig kag gusto magtimalos.
13. Nagahimo sang mga risgo nga bagay nga posible magaresulta sa kamatayun.
14. Nagahambal ukon nagapaminsar sang kamatayun.
15. May hinali nga pagbag-o sang pagbinatasan ukon modo gikan sa malipayun kag hinali lang nga mangin masinulob-on.
16. Ginapanghatag na ang mga importante nga gamit.
17. Nagapamilinbilin na sa mga abyan kag pamilya.
18. Ginakaayo na ang mga importante nga bagay kaangay sang paghimo sang will.
Kun makita na ang bisan isa lang sini nga mga sintomas, magpalapit na gilayun sa mga health professionals .
Mangin handa man sa pag-alalay sa pamilya nga may kaangay sini nga palatandaan./PN
