SADTONG 2018 pa nakabaton ang Presidential Anti-Corruption Commission (PACC), nga ginapangunahan ni Ginoong Dante Jimenez, sang 411 ka reklamo angot sa ginasiling nga korapsyon (corruption) sa nagakalain-lain nga departmento kag ahensya sang gobyerno.
Ini nga mga reklamo nabaton sang PACC halin Marso tubtub Setyembre sang ina man nga tuig 2018.
Ang 59 sini “verifiable” nga complaints. Suportado, sunu sa PACC, sang mga dokumento, nga ang kalabananan sini ginatudlo sa Department of Public Works and Highways (DPWH).
DPWH secretary Mark Villar nagpasalig nga aksyonan niya ining mga reklamo.
Angot diri, gintukod kuno ni Villar ang Task ForceAgainst Graft and Corruption (TAG) sa idalom sang Department Order 101-2020, agud imbestigaran ining reklamo sang korapsyon batok sa mga opisyales sang DPWH upod sa iban pa nga opisyales sang gobyerno.
Pero, diin na ang ginpasalig niya nga imbestigasyon kay tubtub subong wala man gani batia?
Okey, so may ginhimo gid man si Secretary Villar parti sa mga kabulastugan dira sa DPWH. Siling niya may 30 ka contractor na ang na-blacklist.
May ginapatuman man kuno ang iya upisina sang mga reporma, katulad sang Infra-Track App batok sa ghost projects paagi sa geotagging kag drone monitoring.
Subong man ang Civil Works App, nga naga-eliminar sang compliance monitoring.
Yara man kuno ang Project and Contract Management Application or PCMA, nga centralized database nga nagapatigayon sang “real-time” updating kag nagapadasig sang analysis kag problem resolution sa project/contract level.
Pero daw nalipatan na lang ang ining mga reklamo sa korapsyon dira sa DPWH, tubtub nga ginkwestyon ang proposed allocation sang DPWH sa 2021 National Budget sa Senate hearing sadtong Oktubre 2020.
Ginkwestyon ni Senador Panfilo Lacson ang “lumpsum appropriations” para sa DPWH. Wala seguro malipat si Lacson sa mga anomaliya angot sa pork barrel sang nagliligad nga pang-gobyerno, sa diin gintugyan sa kada congressmen kag senador ang paggasto sini sa kon diin nila luyag. Ang resulta, daku nga bahin sini ang nagtupa lang sa personal nga bulsa nila, nga ang iban indi gani mahibal-an kon diin pangitaon sang COA.
Sa sining Senate budget hearing, nagpahayag si PACC commissioner Greco Belgica sadtong Oktubre 24, 2020 nga gin-otorisahan na ang PACC ni Secretary Villar agud imbestigaran ining mga reklamo sa korapsyon nga ginbaton sini sadtong Marso tubtub Setyembre 2020. Subong lang? Pagkaligad lang sang duha ka tuig? Daw bao kon maglakat ba!
Aba, may lista gani kuno sila sang mga lawmakers (congreesmen kag/ukon senador) nga involved sa korapsyon dira sa DPWH!
Nahimo ini seguro sining mg lawmakers sa madamo nga pahito kag paggamit sang ila impluwensya sa mga opisyales sang DPWH agud padag-on ang ila paborito nga mga contractor, nga lakip na syempre ang ila komisyon sa ilegal nga transaksyon.
Sunu sa Global Infrastructure Anti-Corruption Centre (GIACC), ining corrupt practices nagalakip sang “bribery, extortion, fraud, deception, collusion, cartel, abuse of power, embezzlement, trading and money laundering”.
Tungod sini, ginpamilit ni Senador Panfilo Lacson, nga chairman sang naga-imbestigar nga Senate Committee, kag ni Senate President Tito Sotto nga ipabutyag ang ila ngalan agud pasabton sa Senate hearing.
Namalibad si Belgica sa paghatag sang mga ngalan sining mga lamakers, kay basi ma-compromise kuno ang imbestigasyon.
Aba, public officials sila kag dapat lang makahibalo ang publiko sang mga akusasyon sa ila, nga kabahin sang oversight function sang Kongreso. Paagi sini maunahan na tapna ang ano man nga kabulustugan sang aton mga suluguon sang banwa, sa kabug-usan, bag-o idangop ang ila kaso sa husgado.
In fact, kon ginhingadlan gani ang anom ka partylist lawmakers kag ginpatawag (wala ugaling sila ka-attend) sa Senate hearing sadtong Nobyembre 3, 2020 sa isyu sang red-tagging, ngaa abe indi mahingadlan ining mga kasubong nila nga mga lawmakers kag ipatubang sa Senate hearing?
Ano gid abe ang ila kinalain kay pareho man sila nga mga lawmakers? Tsk, tsk, tsk!/PN
