NANGIN masakit ang mga tinaga nga ginpanghaboy ni President Rodrigo Duterte kay Vice President Leni Robredo sa isyu sang “quick response” sa mga nahalitan sang bagyo “Ulysses” sa Luzon. Kaangay bala nga naakig ang Presidente kay gin-agawan sya sang trabaho sang Bise Presidente.
Nangin kumpetisyon na ang pagserbisyo sa mga nahalitan sang bagyo. Kuntani kun nagabuligay ang duha ka pinakamataas nga opisina sang gobyerno sang Pilipinas, mas nangin masangkad kag epektibo pa gid ang ila pagbulig sa mga nahalitan.
Sa pihak sang mga makahang nga tinaga nga ginhaboy ni Duterte kay Robredo, nagapati kita nga indi ini ang matuod nga unod sang dughan sang atun Presidente. Ayhan may mga tawo lang nga nagtunghol sa iya sang sala nga impormasyon.
Maathag nga sa madamo nga higayun nangin maayo ang pagtrato ni Duterte kay Robredo apang hinali lang nga nagaaslum sa wala nahibaluan nga kabangdanan. Posible nga may nagaduhol sang sala nga impormasyon sa iya.
Ngaa abi masaklaw ang Presidente sa ginahimo nga pagbulig sang iya Bise Presidente? Sa matuod lang, ang mas masaklaw amo ang mga gintugyanan sang katungdanan sang gobyerno nga amo ang magsabat sa mga kinahanglanon sang mga nahalitan sang kalamidad.
Ayhan nahadlok sila nga pangsikaran sang Presidente sa ila pwesto gani ginapatalang nila ang kaakig sini sa oposisyon. Sa sina doble ang ila kabi…maakig sa kontra ang Presidente, nakaluwas pa sila sa buga sini.
Kun tun-an ang mga nangin pahayag sang Presidente sa tagsa sya maggwa sa telebisyon, maathag nga may kakulangan ang impormasyon nga ginahatag sa iya sang katapo sang Gabinete. Maathag nga may gusto sila hinabunan nga kapalpakan.
Halimbawa lang diri sa COVID-19 response. Ngaa may nagasiling nga palpak ang gobyerno sa pag-away sini sa una nga hugnat sang transmission?
Ina bangud palpak ang tinugyanan sini sang trabaho nga amo ang Department of Health. Kun nangin madasig ang hulag sang DOH, wala nabudlayan ang Presidente sa paghimo sang mga lihok. Ugaling kay nangin ulihi na ang hulag sang DOH.
Amo man ini sa quick response sa kalamidad. May tinugyanan na ang gobyerno nga magdumala sini. Ara ang National Disaster Risk Reduction and Management Council (NDRRMC) nga may sanga sa tagsa ka rehiyon tubtob sa kabarangayan. Ang tanan nga suporta sang gobyerno nasyonal ara na sa ila. May trainings, kagamitan kag personnel na sila para diri. Ngaa kulang? Indi naton ina masabat.
Ang paghanda kontra sa kalamidad dapat personal sa aton. Ano ang buot silingon sini? Dapat handa ang tagsa-tagsa.
Sa malawig na nga panahon ginakampanya nga dapat ang tagsa sa atun mayk kaugalingon nga survival kit nga makalawig sang tatalo ka adlaw ukon 72 ka oras. Nagaunod ini sang pagkaon, panapton, bulong, tubig, flashlight kag iban pa.
Ang 27 oras amo ang kalawigon sang kinaandan nga makalambot ang bulig sang gobyerno matapos ang pagsalakay sang kalamidad. Ini ang wala naobra sang tanan. Pila lang ayhan ang nagahimo sini.
Kuntani kun ginahambalan kita nga mag-evacuate, evacuate kita dayun. Sa tanan nga oras, handaan ang pinakamalala nga sitwasyon.
Tandaan: ang gobyerno, labaw sa tanan ang iban nga tawo, indi maghanda para sa imo kontra sa kalamidad. Ikaw dapat ang maghanda para sa kaugalingon mo./PN
