MADAMO sang reklamo nga nabaton ang mga ahensya sang gobyerno tuhoy sa ila nga pagpamalaklon sa online ukon ang ginatawag nga online shopping.
Nagdamo ang reklamo sa panahon nga ginapatuman ang hugot nga community quarantine kag ang tawo ang nagasandig na lang sa pagbakal sang pagkaon kag iban pa nga kinahanglanon paagi sa social media.
Samtang masaku ang lantaw sang tawo sa iya cellphone kag nagakaganyat sa mga baligya nga nagalabay sa iya cellphone. Nagatumar sang interes kag wala nakalikaw sa pag-order sa naluyagan nga bagay.
Kadungan sang madamo nga indibidwal nga nagapamalaklon sa online shopping, mas man nga nadugangan ang mga reklamo nga nagtuluhaw batok sa mga dalagku nga online shopping platform.
Nakabaton ang Fair Trade Enforcement Bureau sang Department of Trade and Industry sang 13,674 ka reklamo kag mayoriya nga napatuhuyan sini amo ang Shopee kag Lazada.
Base sa datus sang DTI, 88.03 percent sang total online complaints umpisa Enero tubtub Setyembre 25, 2020 ang ginapatuhoy sa Lazada kag Shopee, samtang ang 13.97 percent ang reklamo sa mga transaksyon sa Facebook kag iban pa nga online platforms.
Namutikan sang DTI nga may yara lang sang 2,457 ka mga reklamo sa bug-os nga tuig 2019 ikumparar sa kapin 14,000 ka reklamo sa frist quarter sang tuig 2020.
Ang tatlo ka nagapanguna nga mga reklamo amo ang may kaantanan sa Price Act (55 percent), depektuso nga mga produkto (21.03 percent), kag deceptive, unfair, or unconscionable sales acts or practices (13.86 percent).
Ginalantaw sang DTI nga bangud sa malawig nga community quarantine, ang tawo nagsalig na lamang sa online shopping apang kadamuan ang ginbiktima sang mga bentahuso.
Bangud sini, nagbalay sang pinakauna nga ordinansa sa bug-os nga pungsod ang 13th Sangguniang Panlalawigan ng Iloilo agud nga maproteksyunan ang mga Ilonggo nga konsumidor.
Ginduso ni 3rd District Board Member Jason Gonzales ang Proposed Provincial Ordinance No. 2020-09-14 may tigulo “An Ordinance Providing Protection Against Online Fraud, Online Scam and Providing Penalties Thereof.”
Ginakabig ini karon nga landmark legislation sang 13th Iloilo SP kag mahimo ini nga sundon sang iban nga mga local government unit agud maproteksyunan man nila ang ila mga kasimanwa.
Mas manami kon Cash On Delivery (COD) ang pagbayad agud nga kon indi magsibu sa gin-order ang gin-deliver, mahimo nga indi na lang pagbayaran kag agud nga ibalik sang courier sa seller.
Ginsiling sini nga madamo sang konsumidor ang wala ginapasugtan sang naga-deliver nga buksan ang putos sang iya ginbakal agud masiguro kon bala ang gina-deliver amo gid man ang yara sa order, paagi sa ordinansa mahimo na maka-insister ang nagbakal nga lantawon anay ang gin-deliver antes bayaran.
Gindugang sini nga kon nabuksan na ang package kag indi sibu sa gin-order sang nagbakal, mabudlay na nga ibalik sa seller ilabi na nga indi magbaton sang reklamo ang courier bangud tagdul-ong lang sila sang ginpadala nga package.
Ang proteksyon nga ginahatag sa mga konsumidor amo ang paglantaw sa gina-deliver kon sibu sa speficication, kon indi peke ukon indi expired.
Tuman ka kumplikado kag dugay ang pagproseso kon ibalik ang sala nga order ukon depektuso nga item sa online seller. Bangud sini madamo sang konsumidor ang wala na nagareklamo kon gamay nga kantidad ang imbolbado.
Ginpabutyag sini nga paagi sa sini nga ordinansa, may kinamatarong na ang bumalakal nga buksan ang package sang iya ginbakal.
Kon nakabayad na paagi sa digital payment, dapat buksan sa gihapon sa atubang sang nag-deliver kag ibalik kon indi sibu sa ginbakal, indi pagbatunon agud mas mabakod ang kaso nga tuyo ireklamo.
Ipahibalo sa tag-deliver nga may ordinansa ang probinsya sang Iloilo kon nagapamalibad ini nga buksan ang package sang imo ginbakal.
May penalidad nga pagkapriso sang tubtub1 ka tuig kag/ukon multa nga 1,000 pesos tubtub 5,000 pesos depende sa diskrisyon sang korte.
Kon may ginahulat nga items gikan sa manug-deliver, dapat nga ihanda ang balor nga bayaran, lantawon ang description sang item sa iya putos, dapat may video ang transaction ukon ang pag-deliver agud nga makita gid kag may ebidensya kon tuhay ang nag-abot kaysa sa gin-order.
Tandaan naton nga ang ordinansa aplikable lamang para sa bug-os nga probinsya sang Iloilo kag wala nalakip diri ang syudad sang Iloilo.
Paagi sa sini nga ordinansa, matapna ang transaksyon nga palapaw ukon nagapaniplang sa mga konsumidor. Matagam na ang mga online seller sa pagtinonto sa ila igapadala nga produkto, ilabi na kon ang destinasyon amo ang probinsya sang Iloilo, bangud nga indi mabayaran kon indi pagtugutan nga mabuksan kag malantaw sang kustomer ang produkto nga iya ginbakal.
Matumod man sang mga courier kon sin-o sa mga kliyente nila nga seller ang nagatinonto sa ila mga kustomer.
Nagapanguna nga tuyo sang ordinansa nga maproteksyunan ang mga konsumidor nga naga-online shopping. Apang lipod sa ihibalo sang tanan, mabuligan man ang DTI, ang PNP, ang mga courier kag online shopping platforms nga matapna ang online fraud ukon scam, mabuhinan ang kadamuon sang reklamo kag mas mangin may integridad kag mangin masaligan na ang mga seller. (bertladera@gmail.com/PN)
