SA PIHAK sang pandemya, dayun sa gihapon ang Dinagyang 2021.
Bisan nga indi live ang dagyang sang mga tribu kag tawo sa kalye, ang kasadya nga dala sang festival mabatyagan.
Ang Iloilo Dinagyang Festival ang pinakauna nga festival sa pungsod nga magagamit sang kasangkad kag kusog sang teknolohiya agud mapadayun ang debosyon kag mangin trendsetter pa.
Subong nga tuig amo man ang pinakauna nga pagsaulog sang Dinagyang Festival nga wala sang linagumba sa kalye. Wala sang dinaguso kag ginutok. Sa baylo magabantay ang tanan sa Facebook, YouTube kag sa telebisyon. Pinakauna ini nga Digital Festival presentation. Ini ang One Dinagyang Digital.
Digital ang tanan bangud indi man maakomodar sa isa lang ka venue. Ang misa, novena kag sadsad tanan makita sa nagkalainlain nga social media platform.
Kun pasangkaron natun ang panan-awan, maayo na man lang gani kay indi na kita kinahanglan nga maggwa sa balay. Indi na maggasto sa pamasahe ukon pagkaon. Pero siling nila mas manami gid kun live ka sa lugar kay mabatyagan mo ang matuod nga kainit sang debosyon.
Sa pahayag ni Mr. Romel Flogen, presidente sang Ilonggo Artists Festival Association (IAFA), indi man live ang performance apang ang enerhiya, talento, produksyon, choreography kag iban pa kaangay man sang live nga pagpasundayag.
Ang lihok sang Iloilo Festivals Foundation Inc. (IFFI) nga maggamit sang digital platform sa pagpasundayag sang karon nga Dinagyang isa ka pamatuod sang maalam nga desisyon. Panginbolahan sa IFFI sa pagpanguna ni Atty. Jobert Peñaflorida. Kun wala nio madumduman ini nga pamaagi ayhan indi masaksihanang Dinagyang subong nga tuig.
Pito ka tribu ang balantayan. Pito ka sugilanon ang masaksihan. Ina sa kasulhay sa sulod sang inyo panimalay. Dinagyang Digital 2021 sigurado nga sundon, ilugon kag mangin modelo sang iban nga festivals sa pungsod.
Kilitaay kita sa highlights sa Enero 24 sa nagkalainlain nga social media accounts sa Iloilo. Ang Panay News kag RMN Iloilo magadala sa inyo sini live. Indi na kinahanglan nga magpanagil-ot kag magpainit sa gwa.
Ang kinahanglan mo lang amo ang mabaskog nga internet kag bastante nga battery sang inyo cellphone./PN
