MADAMO sang mga tawo ukon politiko nga ginagamit ang pumuluyo nga sadsaran sang ila panindugan apang ang bunga para man lang sa ila kabulosgan. Makatilingil pamatian ang panindugan sang mga politiko nga maathag man nga tiko, apang pilit nga gindpakigbato para ang kaugalingon nga tambubo mapuno.
Normal man lang nga sa away sa politika may nagadaug kag may nagakalutos. Ang nagadaug amo ang mangin administrasyon; ang nalutos amo ang mangin oposisyon.
Ang malain pa kay sa tanan nga ti-on, ang nagapungko sa palangakuan ang may kakulangan, samtang ang oposisyon lang ang may matarong nga plano apang wala ginapamati-an.
Pero kun ikaw mangin-alamon nga sahi sang pumuluyo, indi ka gilayun mamati sa mga tinaga sang magtimbang nga bahin. Makahibalo ka magsipad-sipad sang mga kaundan sang ila panindugan kag magbasa sini indi lang sa makita, kundi pati na sa ginapahapyaw nga katuyuan. Mas delikado kag balantayan ang ginatago nga katuyuan sang natungdan.
Makalooy man ang ara sa ehekutibo kun wala ka sang kaalyado sa lehislatibo. Halimbawa lang sa banwa kun wala ka sang imo konsehal, mabudlayan ka magduso sang imo programa bisan pa sa kaayuhan sang mga tawo.
Maathag man nga sa masami, may nagapamalabag bisan pa nga wala man sang problema, basta para lang sa pihak nga kampo, indi sila kay indi maayo ang ginahimo sang ehekutibo.
Ang pamangkot, para gid ayhan sa tawo? Ukon indi nila luyag nga makahimo sang maayo ang ehekutibo agud wala sang mapakita nga performance. Sa sina nga pamaagi, mahapos nila lutuson sa masunod nga eleksyon ang nagapungko sa pwesto.
Ini nagapakita nga ang hulag sang nagapamalabag indi para sa banwa, kundi para sa ila kaugalingon nga politika. Panigurado nga magapabilin ukon makabulos sila sa pwesto bangud mapakita nila nga wala sang hinimuan ang ehekutibo.
Buot hambalon ang ginahimo sang oposisyon pagpamalabag indi para sa kaayuhan sang tanan, kundi sang ila kaugalingon nga handum.
Kuntani, antes mamalabag, usisaon ang kaugalingon kun bala ini bulig sa banwa ukon pagsablag lang sa nagapungko nga kontra. Kun halin pa lamang sang umpisa nahikay ka na sa tawo sa pwesto kag nangin kasumponmg mo pa sa pihak nga partido, sigurado ang imo panan-awan kag tindog parte sa iya lunsay na negatibo.
Tawag sang oposisyon sa ila kaugalingon fiscalizer. Apang sa matuod lang, indi. Sila amo ang matuod nga obstructionist. Indi na sila makakilala sang ila kaugalingon kay nahubog na sang depensa sang kawsa para sa kaugalingon nga agenda.
Tuhay naman nga sitwasyon ang karon sa nasyonal nga pangginahom. Kay daw maathag man nga dapat manindugan ang oposisyon kontra administrasyon.
Kunsabagay maayo man nga may oposisyon agud indi magdali-dali himo sang katuntuhan ang ara sa poder. Ugaling kuntani ang oposisyon indi man magbalabag basta lang makabalabag. Dapat sa tanan nga hulag, ang pangkabilugan nga bwasdamlag ang ginahangad./PN
