NAGTAKOP ang tuig 2020 sang 13th Sangguniang Panlalawigan ng Iloilo nga may dalayawon nga performance paagi sa pagpasar sang 42 ka mga ordinansa nga ginalakipan sang 35 ka mga Provincial Ordinances kag pito ka mga Appropriation Ordinances.
Nakahiwat sila sang 53 ka regular sessions, 40 ka mga committee hearings kag naduso ang 882 ka mga resolutions.
Wala nalauman nga ang lloilo SP makalab-ot sa sini nga kadamuon sang napasar nga mga ordinansa sa sini nga tuig kag mas madamo ini ikumparar sadtong 11th Iloilo SP sadtong 2013 tubtub 2016 kag 12th Iloilo SP sadtong 2016 tubtub 2019.
Kapin sa 13 ka COVID-19 related ordinances ang napasar bangud sa pandemya kag agud nga magiyahan kag mapangapinan ang mga pumuluyo batok sa paglaton sang virus. Ini man ang rason kon ngaa nagdamo ang napasar nga mga ordinansa suno kay Vice Gov. Christine “Tingting” Garin.
Bisan pa nga may pandemya, makita ang aktibo nga pagpakigbahin sang mga katapo sang Provincial Board.
Wala nakatuga sang daku nga sablag sa pagserbisyo sa pumuluyo ang kakugmat nga dala sang pandemya. Mas nagapangibabaw ang pagtalupangod sa interes kag benepisyo nga napatuhoy para sa pumuluyo. Gilayon nga gina-aktuhan ang mga bagay nga nagakinahanglan sang gilayon nga atensyon.
Bisan si 4th District Senior Board Member Rolando Distura ang nagasiling nga “very cordial and very productive” ang relasyon nga nagapatunga sa ila nga mga katapo sang 13th Iloilo SP.
Natun-an nila nga mapasanyog ang ila ikasangkol sa pagpaathag sang mga ideya nga wala nagatuga sang pagkapilas sang balatyagon sang kada isa. Nangin mahinalungon sila sa paghatag sang rason kag paggamit sang mga tinaga nga ila ginabungat.
Natalupangdan man sini nga lunsay performance-oriented ang iya mga kaupdanan rason nga madamo sang ordinansa ang napasar, naduso ang madamo nga resolusyon kag nakahiwat sang madamo man nga committee hearing.
Samtang, si 3rd District Board Member Matt Palabrica ang lubos nga nagapasalamat bangud nakaimpon siya sa sini nga mga sampaton kag mahugod magtrabaho nga mga katapo sang 13th Iloilo SP nga may ikasangkol gid sa pagserbisyo sa mga pumuluyo.
Lubos nga ginapasalamatan ni Palabrica ang kooperasyon sang mga board members kag ang liderato ni Vice Governor Garin. Ginpabutyag sini nga bisan may magkatuhay sila nga pagpati, prinsipyo kag istilo sa pagka-lider apang ila gid nadumala nga maka-perform bangud nga ila ginatahud ang pagka-pinasahi sang kada isa.
Ginakabig ni Palabrica nga “active, responsive, kag people in action” ang karon nga Provincial Board. Nagapasalamat man siya sa ila “responsiveness” nga ila napahagan-hagan ang kabug-at nga ginatus-on sang pumuluyo dala sang COVID-19 pandemic.
Ginhatagan man sini sang 9 nga grado, sa scale nga 1 tubtub 10 kon sa diin 10 ang pinakamataas, ang mga board member bangud sa gwa ukon sa sulod man sang session hall sila ang may maayo nga relasyon ukon kaantanan sa kada isa. Sa tunga sang “political difference”, ginapakita sang kada isa ang pagka-gentleman ukon gentle lady.
Ginapun-an sang mga katapo ang kakulangan sang kada isa kag ginapakita sang kada isa ang ila maayo nga pagtamdanay kag nagapadala sang keyk sa kaangay nga board member kon isa sa ila ang nagasaulog sang kaadlawan.
Natalupangdan man nga sa nakalipas nga duha ka selebrasyon sang paskwa, naghiwat sila sang Christmas party nga gintambungan gid sang tanan nga mga katapo sang 13th Iloilo SP.
Sa bahin ni Ex-Officio Board Member Ramon Sullano, ang Interim President sang Philippine Councilors League – Iloilo Chapter, tama gid kaayo ang relasyon sang mga katapo sang 13th Sangguniang Panlalawigan ng Iloilo sa sulod kag sa gwa sang session hall.
Napamatud-an sini nga nagarespeto sila sa tagsa-tagsa kag ilabi na sa mga panan-awan tuhoy sa ginapadangat sa ila nga “issues and concerns” sa 13th Iloilo SP.
Ginsiling sini nga daku nga bahin ukon factor ang liderato nga ginapakita ni Vice Governor Garin nga amo ang kabangdanan sang ila maayo nga pagtamdanay sa kada isa.
Kon maayo ang liderato, nagalantaw man ang kada katapo kon paano ipatungod ang pagrespeto sa kada isa.
Nagalaum kita nga magapabilin ang maayo nga relasyon sa tunga sang mga katapo sang Provincial Board kag ila ipangibabaw ang interes kag kaayuhan sang bug-os nga probinsya sang Iloilo.
Kahibalo ang tanan nga nagapasulod na kita sa panahon sang eleksyon. Sa bulan sang Oktubre ukon Nobyembre posible hiwaton na ang “filing of candidacy” sang mga luyag magpadalagan. Posible nga mangin mitsa ini sang pagpabahin-bahin apang nagapati ang tanan nga indi maapektuhan sang pulitika ang ila maayonga pagtamdanay.
Kuntani mangibabaw ang maayo nga relasyon labaw sa pulitika.
Ang paghugpong sang Provincial Board daku nga bagay para sa padayon nga pagtin-ad sang probinsya sang Iloilo. (bertladera@gmail.com/PN)
