MAKATATLO na ka beses nga gintuyo nga bahinon sa duha ka distrito ang syudad sang Iloilo.
Una ini sadtong panahon ni anay congressman Raul Gonzalez Jr.
Ginsundan ini sang duha ka hagna nga gin-file ni anay congressman kag karon mayor Jerry Treñas.
Ini tanan nga mga hagna wala napasar bangud wala sang suporta gikan sa Senado.
Siling sang mga nagapamatok, ang pagtunga sang syudad sa duha ka distrito para lang sa kahapusan kag kapuslanan sang politiko. Ilabi na nga ginahuring-huring nga madalagan si Sen. Franklin Drilon kontra kay Cong. Jam-jam Baronda.
Kun matuod ini nga mga balita, maathag nga para sa ila lang kahapusan ang pagtunga sang syudad. Ini agud indi sila magbungguanay sa 2022 nga piniliay.
Apang maluwas sa mga politiko, makapulos man ayhan ang ordinaryo nga tawo?
Madamo ang nagasiling nga ano ang pulos namon dira?
Pero dako ang bentaha sini sa syudad sa pangkabilugan. Ngaa man? Hamakon mo may duha ka ka tiglawas sa Kongreso. Buot silingon duha ang tingog sa Kongreso kag duha man ang magadala sang mga proyekto sa syudad sang Iloilo.
Ang problema lang abi sa atun kay gusto ta nga proyekto ang makita kag mauyatan ta. Pero wala kita ya kahibalo nga ang serbisyo sosyal nga proyekto mas labi nga kinahanglan sang tawo subong? Kaangay sang bulig sa hospital, bakal sang bulong, trabaho, scholarships kag livelihood programs. Ini nga sahi sang mga proyekto amo ang may direkta nga epekto sa tawo nga nakabaton sang bulig. Ina lang galeng, kun wala ka sini natup-an, indi mo mabatyagan.
Pero maayo na lang nga wala ako nakapangayo bulig para sa ospital ukon bulong kay buot silingon maayo ang akun panglawason.
Kun kaisa, kun tani hatagan man natun sang kahigayunan ang mga pagbag-o bisan pa nga natublag ang atun personal nga interes. Ang Iloilo pwede na mangin duna ka political district. Kun nahimo ini sa iban nga indi gani pwede, ngaa abi indi sa Iloilo?
Ang importante nga sa masunod nga election indi lang maalam ang kwalipikasyon sang atun botohon. Kundi ang tawo nga mabatyagan ang pag-ulikid sa nasakupan, mahapos palapitan bisan sang ordinaryo nga tawo, nagatupa ang bulig kag proytekto, nagadihon sang programa para sa kaayuhan sang tanan, kag labaw sa tanan, indi madinumuton, indi matinimaluson!
Ang problema indi kun mangin duha ka distrito ang syudad. Ang problema kun ang ginaboto recycled lang nga tawo.
Indi na pagtugutan nga ang inyo lugar gamhan lang sang isa ka tawo kay sigurado sa poder magaabuso!/PN
