MAKATULUBLAG na sa aton mga pumuluyo ang padayon nga pagpamatay sang riding-in-tandem, ukon ining naga-angkasanay sa motorcycle nga mga kriminal.
Naglala pa gani ini sa pagsugod sang Gyera Kontra Droga ni Presidente Duterte sa iya pagpamahog nga “I will kill you!” Tumod sini ang mga drug personalities.
Tungod sini, ang suspetso sang madamo nga kahimuan ini sang pila ka pulis sa pagsunod sa sining sugo ni Presidente Duterte sunu sa ila paghangop. Ngaa man? Man, ang nabiktima nila mga suspetsado sa ilegal nga droga. Pila sining pagpatay kwestyonable gani nga wala naman sing may napasakaan kaso.
Dugang pa kay gin-justify ini sang mga vigilante. Pribado ini nga mga tawo nga may daku nga kaakig kag luyag gid magpatay sa mga durugista.
Either tungod nangin biktima ang pila ka myembro sang ila pamilya sang salot nga droga. Ukon tungod mismo sa kahinay sang hustisya sa pungsod nga luyag na
gid lang nila ibutang ang kasuguan sa ila mga kamot.
Ang siste pa kay naghatag pa ini seguro sing justification sa iban agud tumbahon ang ila ginakaugtan, labi na gid kay wala man sing pakialam ukon nahadlok man makialam ang publiko.
In fact, sunu sa Panay News, sa Pebrero 9, 2021 sini nga isyu, mga 1,828 na ang napatay sang mga motorcycle-riding nga mga kriminal sugod sadtong Agoto 1, 2019 tubtub Marso 1, 2020.
Ugaling lang kay indi gid ma-justify sang aton Kristohanon nga sosyedad ang pagpatay sang pila sini nga daw ilihaon lang nga manok.
Sa pagtudlo ni Kristo, dapat pangitaon kag ibalik gid ining mga “lost sheep” sa matarong nga katilingban.
Ang tawag gani sa aton mga prisuhan amo ang rehabilitation center, kon diin ginatagaan ang nagkasala sing tsansa sa pagbalik-loob kag magtadlong sang ila pangabuhi kon pwede pa lang.
***
Tungod sining indi mapauntat nga pinatyanay sang riding-in-tandem, nangin daku ini matuod nga palaligban. In fact, daw indi masarangan resolbaron ini sang aton mga otoridad (nga indi kahimbon sang riding-in-tandem). Wala naman sing mahimo ang aton mga pumuluyo nga wala ikasarang magdampig sang ila kaugalingon.
Ang pamangkot: “Paano bala mapauntat ining pinatyanay sang riding-in-tandem sa ngalan sang aton Kristohanon nga sosyedad?”
Kon may mga lihok gid man sa karon, daw wala gid gani sang matudlo nga maayo nga solusyon luas sa solusyon sang mga wala sing Diyos nga mga otoridad (fuera los Buenos) nga wala nagapati sa rule of law.
Natural lang nga may mahatag man sila nga rason sa ila kapaltahan. Ang malapit nga rason nila, nga luyag lang magpahapos, amo nga kulang sing tinawo ang kapulisan sa pagbantay kag pagkilala sa mga suspek.
Mga tanod sa barangay wala man sing ikasarang makigbato sa sining armado nga mga kriminal. Ang mga pumuluyo nahadlok man makialam kag magtudlo sa mga suspek.
***
Sang sining ulihi lang, nadumduman naman sang mga otoridad ang pagtukod sang mga “secret marshals”. Pero ano gid bala sila kadamo agud mabantayan ang ining mga riding-in-tandem sa kalapad sang aton palibut?
Ang lain pa, sunu sa PN Lapsus, kay basi ining “secret marshals” amo man mismo ang mga pulis nga nagahampang vigilante. Ti sin-o abe ang magdakop kag maglagas sa ila?
Maayo na gid lang ang neutral nga kasuguan nga mapatuman sing husto.
Katulad sang isa ka opisyal nga luyag iduso ang isa kasuguan nga nagadula sang angkasanay sa motorcycle. Ugaling kay indi ini pwede!
Undemocratic kag discriminatory ini. Dispabor ini sa aton mga kubos nga mga pumuluyo. Pabor lang ini sa mga manggaran nga makasarang magbakal sang awto, mga van, kag iban pa nga kasubong nga mga salakyan.
Paano abe matuod ang mga kubos nga makasarang lang sang motorsiko nga installment pa ang pagbayad agud makaangkon sini?
Naka-istorya kita sa pila ka abyan kag ang ila suhestyon amo ang “No All-Male Tandem”, ukon wala sing puro lalake nga nagaangkas, kay sa masami ang mga puro lalake man lang ang mga kriminal sa riding-in-tandem.
Daw maayo ina nga suhetyon a, kay pwede makaaangkas ang asawa ukon bana ukon kahagugma, nga malayo masuspetsuhan nga mga kriminal.
Preventive measure ini, kag indi bala “Prevention is better than cure?”
Pwede man tugtan nga ma-convertible ining motorcycle para matakdan sing sidecar nga magamit sang pamilya sa ila paglagaw-lagaw. Indi bala?
Ano abe sa inyo?/PN
