MAKAULUGOT gid man ang masami nga pag-brownout diri sa amon barangay – kag bisan pa sa iban nga lugar sa siyudad – labi na gid kon inoras ang kalawig.
Imagine ang brownout nga isa ka oras, duha, tatlo kag tubtub pa gani sa anom ka oras! Luas pa sa kulba mo nga maguba ang mga appliances mo sa hinali nga pagpatay sang suga, guba man ang online mo nga trabaho sa imo desktop (electricity-powered) computer. Gani pa-MORE gid ang pag-ugtas mo!
Well, ano abe ang himuon kundi mangita na gid lang medyos nga mawili mo ang imo kaugalingon sa pwede mahimo sa balay ukon ano man nga mautihan mo sa mga tanom sa gamay n’yo nga lagwerta.
Kag kon indi man, ang magpahunay-hunay kag maglingaw sang kaugalingon sa musika kag interesante nga talan-awon sa TV ukon sa na-save mo halin sa online.
Katulad sang mga soul-soothing nga mga ambahanon, pili nga mga instansya halin sa sports, ang luyag mo dumdumon nga mga hitabo katulad sang tsunami sa Japan kag Indonesia, mga tumalagsahon nga mga abilidad, kag iban pa.
Lakip na ang pagsid-ing dira sa makawiwili nga competition sa America Got Talent (AGT) sang NBC kag kasubong nga competition shows sa iban nga network.
Isa sa sining competition amo ang paindis-indis nanday Darci Lynne Farmer, nga isa ka ventriloquist (nagapa-“hambal” kag nagapa-“kanta” sang puppet) kag Angelica Hale, nga ginkitaan sang unique kag powerful nga singing voice sadtong Season 12 sang AGT 2017.
Mabudlay ini husgaran tungod ang competition indi sa pareho nga abilidad kundi sa nagalain-lain nga abilidad nga mapakita sang mga contestant – sa kanta man, saot, acrobatics, magic, pakita sang abilidad sang mga hayop, kag iban pa.
Ang padaug diri sandig na gid lang seguro sa audience impact ukon sa ginapakita nga pagdayaw sang publiko.
Nagdaug diri ang 13 anyos nga si Darci Lynne sang Oklahoma City, samtang nagpangaduha si Angelica, ang 10 anyos nga Fil-Am nga taga Atlanta, Georgia.
Sa akon lang, wala sing itulak-butongon sa ila nga duha kon abilidad ang pagahambalan. Kon nagdaug si Darci Lynne tungod lang ina seguro sa mabudlay nga abilidad niya bilang ventriloquist – imagine “mapahambal” kag “mapakanta” mo ang puppet! – nga gamit ang tatlo ka puppet.
Si Angelica may tumalagsahon nga boses – mature kag powerful voice – nga unique makita sa isa ka bata. Pwede siya seguro ma-feature sa mga children stage shows kag bisan sa pelikula sa isa ka dramatic role tungod sang iya mahumok nga pang-guyahon.
***
Nadumduman ko gali ang siling ni Darci sang pamangkuton siya parti sa iya experyensya sa pag-compete sa AGT 2017. “I will always love good competition!” siling niya.
Ako man, “I love good competition”, nga nagapahanumdum sa akon sang sadto masadya nga paindisanay sang GMA kag ABS-CBN TV.
Akig ugaling si Presidente Duterte sa ABS-CBN tungod sang kuno “biased” reporting sini, gani ginpamalabagan niya ang paghatag diri sang frankisa agud liwat maka-broadcast.
Sa kaluoy sang Diyos, bisan paano namedyosan man sang ABS-CBN nga maka-broadcast gihapon paagi sa Free TV kag pakig-areglo sa iban nga TV Networks, katulad sang TV 5 kon diin daw naga-blocktime ini sang ila noontime show ASAP kon Domingo.
Nakahimo man ini sang pagwaragwag sang pila pa ka programa, katulad sang TV Patrol sa YouTube kag sa open social media.
So, ang ginahimo ko amo ang pagsaylo-saylo sa ila Sunday noontime program sunu sa kon ano ang naluyagan ko nga palagwaon sa kada tion.
Lain gid man kon may mainit nga pag-indisanay sang mga top TV networks.
Masadya gid kon may competition. Ang diktador lang ang wala luyag sang kumpetensya; luyag niya siya lang pirme ang bida. Katulad ni Hitler kag sang iya kasubong. Mga haslo!/PN
