MAABTIK mag-una sa pagpabakuna sang Sinovac vaccine ang Philipine General Hospital (PGH) director sadtong nagligad nga inadlaw.
Indi lang seguro agud mapasalig niya ang iya mga tinawo nga wala sila dapat kakulbaan diri.
Kundi tungod man seguro sa pagpasugot sang 94 ka porsyento sang iya mga tinawo sa pre-registration sang pagpabakuna.
Ugaling kay nagpasugot lang gali sila tungod sa pagpati nga ang ihatag sa ila nga bakuna amo ang may mataas nga kalidad nga makapaseguro sa ila sing lubos nga pagpakigbatu sa COVID-19 virus samtang ginaatubang ang risgo nila sa sining makalalaton nga balatian.
Sang mahibal-an ugaling nila nga Sinovac vaccine ang ihatag sa ila nga may 50 ka porsyento lang nga “efficacy”, nagreklamo sila kag nagpahayag ang mga 95 percent sa ila sang indi na pagpasugot.
Diri sa Iloilo City, sunu sa aton palangga nga senador nga si Franklin Drilon, 15 percent lang gani ang luyag magpabakuna sa Sinovac vaccine.
Tuod man, kon may yara man lang nga mas masaligan nga bakuna, nga abe didto ka gid sa mahina ang epekto? Ano ka lipong nga bangros!
Okey man lang seguro ina nga medyo mahina ang epekto basta indi ka madisgrasya. Tutal may Emergency Use Authorization (EUA) man ang Sinovac vaccine, bisan mahina ini, sang World Health Organization (WHO) kag sang Food and Drug Administration (FDA). Pero sin-o sina ugaling ang makapasalig kay pang-emergency lang gani ining una nga mga bakuna?
Problema pa gid kay indi masaligan ang China sa ginasugid sini. Kilala ini sa kalibutan sa pagtagu sang kamatuoran sa madamo nga bagay. Mahuyog ini sa cover-up nga daw wais nga isda nga indi luyag mahulik sang taga sa baba!
Samtang ang iban nga bakuna – katulad sang Pfizer, Moderna kag Astra Zeneca nga mataas ang “efficacy” – hayag sa publiko ang resulta sang ila pangbakuna, nga ginahimo na sa karon sa minilyon nga pumuluyo sa United States kag Uropa.
Tungod sini, nahibal-an dayon sa nag-boluntad sa pagpabakuna kon ano ang kondisyon sang tawo nga hilway ukon indi sa peligro sang pagbakuna. Kag, kon may malain nga matabo, mahibal-an man dayon kag matudlo kon ano ang rason nga dapat likawan sa masunod nga pagbakuna kag kon ano ang mahimo dayon nga remedyo.
Bentaha ini sa aton diri sa Filipinas kay ulihi kita nga nakabaton sang bakuna, kon diin dapat ipaathag gid sing maayo sang aton mga health authorities kon sin-o ang pwede kag indi magpabakuna.
Kon luyag ta pa ma-testingan ang posible nga epekto sang bakuna sa mga Filipino diri mismo sa pungsod, kita sa ining aton kolum nag-rekomendar na gani sa isa ka edisyon sang aton kolum sang nagligad nga unahon bakuna ang pila ka soldado kag pulis – sa nagakaigu nga kadamuon – para mahibal-an kon sin-o ang dapat bakunahan ukon indi.
Tutal pwede man sila mag-boluntad sa ngalan sang ila obligasyon sa pag-risgo sang ila kabuhi para sa mga pumuluyo. May ara pa gani sila sing suicide commando, indi bala?/PN
