GILAYON ako nga nakabaton sang electronic mail (email) gikan kay Joel Locsin ang Media Relations Officer sa talatapan ni Sen. Panfilo Lacson tuhoy sa akon topiko sa sini man nga column nga nabalhag sadtong Huwebes, Marso 4, 2021.
Nagapasalamat ako gilayon nga nakalab-ot sa natungdan ang aton gintalakay nga topiko nga ang tuyo lamang agud nga magpangabay nga imbis pakamalauton ang drug war, kuntani dapat hatagan sang inspirasyon ang nagapakig-away sa ilegal nga druga.
Luyag kon man klaruhon nga wala naton ginsiling nga nahikay si Senator Lacson sa paghimakas sang mga otoridad sa pag-away sa ilegal nga druga. Ginpabutyag gid naton nga nagarespeto kita sa panan-awan sang senador tuhoy sa drug war.
Ginsiling ni Locsin sa iya email nga lubos nga nagasuporta si Sen. Lacson sa kadalag-an sang pagpakig-away sang gobyerno batok sa ilegal nga druga – umpisa pa sadto nga nagserbe siya sa Philippine National Police kag ginpamunuan ini umpisa 1999 tubtub 2001, tubtub sa iya mga termino bilang senador.
Bilang Chief sang PNP, gin-adoptar ni Sen. Lacson ang two-pronged strategy batok sa ilegal nga druga, nagpokus indi lamang sa demand side kundi lakip man sa supply side. Nagakahulugan ini nga indi lamang paglagas sa mga pushers nga yara sa dalanon, kundi lakip man sa mga yadtong naga-suplay sang ilegal nga druga.
Sa iya termino bilang PNP chief, si Sen. Lacson, paagi sa iya “leadership by example”, naghatag sia sang inspirasyon sa pwersa sang kapulisan nga magpabilin nga physically fit kag tumanon ang ila trabaho sing maayo samtang nagasunod sa “no-take” policy nga nagakahulugan nga wala sang suhol kag wala sang “kotong.”
Bilang Senador, indi lamang nga nag-sponsor sia kundi masami pa nga nagadugang sa tuigan nga badyet sang Philippine Drug Enforcement Agency (PDEA) lakip man sang PNP, ang institusyon nga padayon sini nga ginapalangga kag gina-ulikdan.
Ginsiling pa sini nga indi malipod nga ang presensya sang ilegal nga druga nagpabilin bisan pa sang ginbubo nga panahon kag resources sang gobyerno sa paghimakas nga mapapas ang halit sang druga.
Indi man manegar nga ang pila ka tonelada sang shabu sang nagliligad ang ginpalusot pasulod sa pungsod sang mga may koneksyon nga mga sindikato sang ilegal nga druga paagi sa Bureau of Customs, nga gintransaksyon sang mga konbiktado nga yara karon sa Bureau of Corrections.
Ang kaangay sini nga mga hitabu ang makapaathag sang iya ginaduso nga paghimo sang policy adjustments agud matapna ang pagluntad liwat sang PNP-PDEA misencounter, lakip na ang paghimo sa PDEA bilang taglantaw sa anti-drug operations kag magpokus sa intelligence work, kag ibilin ang assault operations sa mga hanas nga police personnel.
Ginpabutyag pa ni Locsin nga si Senador Lacson ang nakahimo sang iya bahin sa pagbulig nga mapapas ang problema sa druga, bilang law enforcer kag bilang lawmaker, kag wala sang pagdudad nga iya ini nga ipadayon. Apang may katungdanan man siya nga ipasiguro nga ang resources nga ginabutang sa anti-drug war ang magatuga sang mga resulta.
Kon kaisa indi lamang kwarta kag kagamitan ang kinahanglan sang isa ka estudyante agud mangin inspirado sa pagtuon, sang empleyado agud nga mangin matutom sa iya obra ukon sang isa ka law enforcer agud nga magpakita sang labaw nga resulta kaysa sa ginalauman gikan sa iya.
Kahibalo man ang tanan nga ang mahumok nga tinaga nga may pagkabalaka ang mas makatandog sa balatyagon kag paminsaron sang kada isa. Ini ang mas may labaw nga epekto kaysa sa kwarta kag resources.
Ang away sa ilegal nga druga indi lamang nagakinahanglan sang kwarta kag resources. Kabuhi ang mas nagapanguna nga ginarisgo sang kapulisan.
Kon may salawayon man sa ila, wala nagakahulugan nga tamayon ukon pakamalauton na ang bug-os nga organisasyon. Dapat ipangibabaw ang interes sang organisasyon kag tatapon ang mga naglisa sa idalom sang iya pandong.
Athagon ko lang, liwaton ko lang nga wala ako nagsiling nga nahikay si Lacson sa aton law enforcers. Luyag ko lang nga hatagan niya sila sang inspirasyon bangud kabuhi nila ang ila ginapatad sa sini nga giyera batok sa ilegal nga druga.
Paagi sa sulat (email), nasabat ang mga pamangkot nga aton ginplastar. Napabutyag kon ano ang nahimo ni Lacson bilang PNP Chief kag bilang Senador sa anti-drug war sang gobyerno.
Luyag ko man pasalamatan si Joel Locsin sa paghatag sang tion sa sini nga column kag sa paghimakas nga mapalab-ot man ang ila bahin kag punto sa sini nga topiko. (bertladera@gmail.com/PN)
