GINAKILALA sang international community ang neutral position sang mga pari agud magsabat sa kalagnon nga kinahanglan sang tawo, kaugyon man ukon kaaway sa gyera.
Subong man sang mga doktor sa ila misyon “to save lives” sang kon sin-o man, kag sang mga abogado sa pagpatuman sang kinamatarong sang suspetsado nga mahatagan sing “day in court” bisan kaaway pa ini.
Bisan gani ang Simbahan Catolica may ginahatag nga “devil’s advocate” agud baison ang pagka-santo sang isa ka kandidato sa sainthood.
Gani ginakabalak-an gid naton ang suspetso nga kahimuan sang pila ka pulis kag mga vigilante ining mga pamahog kag pagpatay sa mga abogado. Labi na gid ang nagapangapin sang mga kaso sa ilegal nga droga, sang mga kaso sang mga rebelde kag sa pag-violar sang human rights.
Sang sini lang, ginhandom nga patyon si Atty. Guillen nga masami ginakuha sa pagpangapin sang mga kaso sa human rights violations kag sang mga rebelde batok sa gobyerno.
Madumduman ta man ang pagpatay sadtong nagligad nga tuig kay Atty. Romero nga masami kuhaon sang mga suspetsado sa ila mga kaso sa ilegal nga droga.
In fact, madamo pa ang kasubong nga mga kaso sang pagpamahog kag pagpatay sa mga abogado nga natabo sa panahon sining karon nga administrasyon.
Ano na lang abe kon wala na sing mangisug nga abogado sa pagtindug sa kasubong nga kaso, sa diin, sa matuod, ang akusado inosente gali sa akusasyon?
Ano na lang ang ila kinamatarong sa idalom sang Universal Human Rights nga ginatindugan sang United Nations kon diin myembro ang Filipinas?
Bale wala na lang? Kag patyon na gid lang sila paagi sa extrajudicial killing (EJK)? Tutal wala naman sila kinahanglan sing tagpangapin nga abogado kay nahusgaran na sila nga “guilty” sang estado nga nagaakto bilang bogus nga hwes kag berdugo katulad ni James Bond nga “licensed to kill”?
***
Diyos gid lang ang makahatag sing sentensya nga wala na sing binaisay sa husgado. Ina tungod wala kita sing pwede malikom sa Diyos nga All-Knowing, nga tal mismo pwede siya makahusgar.
Indi pareho sa tawo nga kinahanglan palutawon pa ang kamatuoran paagi sa pahayag kag pag-presenta sang ebidensya halin sa duha ka bahin, ukon sa isa ka case trial sa atubangan sang hwes. Nga kon indi mapatuman, katulad sa kaso sang EJK, daku nga kasal-anan ini sa ngalan sang Hustisya.
By the way, may isa ka kasal-anan nga indi mapatawad sang Kalangitan diri pa lang sa kalibutan. Ano ini? Ini ang “Sin against the Holy Spirit”, ukon ang kasal-anan sa Diyos Espiritu Santo.
Sunu sa Bibliya sa Matt.12:31:“Therefore I tell you, every sin and blasphemy will be forgiven people, but the blasphemy against the Spirit will not be forgiven”.
Sunu sa Merriam Webster Dictionary, ang tinaga nga blasphemy means “the act of insulting or showing contempt or lack of reverence for God; the act of claiming the attributes of deity; irreverence toward something considered sacred.”
Sunu ugaling sa isa ka Biblical scholar ining “Sin against the Holy Spirit” may kapatawaran man sa ngalan sang Diyos nga All-forgiving.
Wala lang ini kapatawaran kon padayon, ukon persistent, nga ginahimo ini nga kasal-anan sang isa ka tawo nga wala sing pagbag-o nga daw gina-enjoy pa niya himuon pirme. katulad sang pagpamatay sang 6 ka milyon nga Jews sadto sa Germany.
In other words, pwede man siya gihapon mapatawad sang iya “Sin against the Hoy Spirit” paagi sa sincero kag lubos nga paghinulsol. Ugaling lang kay malawig gid seguro ang pagka-“quarantine” niya sa Purgatoryo bag-o makasulod sa Langit.
Isa sa sining “Sin against the Holy Spirit”, sa aton pagpati, amo ang “deliberate” nga pagpatay sang kapareho mo nga tawo nga wala sing “due process” katulad sang nagakatabo sa EJK, nga indi man ma-justify sa self-defense, defense of the defenseless, ukon just war.
Gani, kamo nga may handom nga makasulod sa Langit, likawan gid ang mga kasal-anan nga nagatampalas kag nagabulag sa aton sa Diyos, nga nagalakip sang pagkadula sing paglaum sa grasya sang Diyos kag ang pagsikway sang Diyos sa aton pangabuhi.
Indi magsalig nga mapatawad ka man sa imo “Sin against the Holy Spirit” kay sobra-sobra gid seguro ang balayran nga utang sang imo kalag sa Purgatoryo./PN
