GINADAYAW kag ginapanginbulahan gid sang bag-o nga liderato sang Department of Education 6 (DepEd-6) ang mga nagabug-os sa sini nga ahensya, lakip ang komunidad sa pagtib-ong sang mga kampiyon.
Ginatawag nga kampiyon, indi bangud nga nagdaug sa paindis-indis kundi bangud nagmadinalag-on sa pagpaimprubar sa mga istratehiya kon paano makatuon ang mga estudyante sa tunga sang pandemya dala sang COVID-19.
Luyag sang liderato sang DepEd-6 nga mahatagan sang importansya, igtalupangod kag hitaron sing lubos lamang nga makita sang tanan ang pinasahi nga kinaiya sang mga manunudlo sang Western Visayas.
Sa ginhiwat nga virtual press conference sadtong Martes, Marso 16 sang DepEd-6, ginpakilala ang bag-o nga Regional Director nga si Dr. Ramir Uytico, kag ang OIC Assistant Regional Director nga si Dr. Pedro Escobarte Jr., nga lunsay gikan sa DepEd Region 8 office.
Gindayaw sang duha ang kabudlay kag determinasyon sang mga nagabug-os sa DepEd-6 lakip ang mga opisyales sang mga buluthuan, mga ginikanan kag mga bumulutho sa pagbuylog sa kada isa sa tunga sang pandemya.
Maathag man sa tanan nga may mga reklamo man nga nabatian apang ang DepEd nagahatag gilayon sang solusyon sa lebel sang mga buluthuan agud nga maresolbar kag indi na maglala ang problema rason nga gamay ukon halos wala sang reklamo nga ginapalab-ot sa DepEd.
Pabakuron kag pasanyugon sang bag-o nga liderato sang DepEd-6 ang naumpisahan nga sahi sang pagtrabaho sang mga opisyales sa lokal kag rehiyunal nga bahin.
Nangin higayon man ang virtual press conference agud ilunsar ang duha ka mayor nga mga proyekto nga amo regional “mantra” kag ang pagtukod sang local farm schools.
Gintumod sini nga mantra ang tagline sang DepEd-6 nga “home of the champion” nga dapat i-maximize sa tanan nga stakeholders.
Nagakadapat lamang nga mapagkit ini sa pang-ino-ino sang mga nagatrabaho sa regional office sang DepEd-6, sa mga division office, kag sa mga district officials, lakip na ang mga principal, mga manunudlo, mga ginikanan kag mga bumulutho.
Nagakadapat lamang nga mangin sampaton ang tanan sa ila ginaobra kag ipabugal nga ang ginahimakasan nagabunga sang masanag nga palaabuton para sa komunidad.
Ipanuto nga ang kampiyon amo yadtong nagabatas sa kabudlay,yadtong nagapangibabaw sa anuman nga hangkat sang panahon kag nakalampuwas sa anuman nga upang tubtub nga maagom ang ginahandom sa kabuhi.
Diri makita kon paano nagahatag sang balor sa iya kaugalingon ang isa ka tawo, paagi sa determinasyon nga magpangibabaw sa mga kabudlay. Ini ang matuod nga kampiyon bangud mahatagan niya sang padya nga labaw sa kantidad ang iya kaugalingon, ini ang padya sang masanag nga bwas-damlag.
Ipadayon naton ang paghatag sang inspirasyon sa mga kabataan, sa mga bumulutho agud nga ila makita ang dalan nga ila ginausoy, giya agud indi magtalang kag agud may lantawon sila nga dapat nila ilugon, makaangkon sang kaalam kon paano malab-ot ang handom nga makahatag sang kasulhay sa ila pagpangabuhi sa palaabuton.
Lakip man nga ginhatagan sang atensyon ang pagtukod sang farm schools nga makabulig gid sa mga pigado apang nagakaangay nga mga estudyante.
Tubtub sa karon, wala pa sang may napatuman nga Rural Farm School sa bisan diin nga rehiyon sa pungsod bisan pa nga ang Republic Act No. 10618 ukon Rural Farm Schools Act ang nangin kasuguan sadtong 2013.
Tuyo sang layi nga magtukod sang pampubliko ukon pribado nga farm schools sa mga rural area.
Atipanon man sang DepEd-6 ang mental health programs kag iya hingyuon ang suporta sang iban nga mga ahensya kaangay sang Department of Health (DOH) kag Department of Social Welfare and Development (DSWD).
Lauman naton nga sa bag-o nga liderato sang DepEd-6 mahatagan sang importansya ang pangkabug-usan nga kaayuhan sang isa ka estudyante agud mangin mas maayo ini nga bumulutho.
Ipatudok sa tanan nga estudyante kag manunudlo nga sila ang lunsay kampiyon. Tudluan sang rural farm school agud mangin supisyente ang pagkaon.
Ang tawo nga gutom indi makapaminsar sang hilway kag tadlong. Napamatud-an na sa pila ka pagtuon ukon panalawsaw nga indi makabati ang dulunggan sa anuman nga ginatudlo sang manunudlo kon ang tiyan sang bata nagaraguok sa kagutom.
Kon gutom ang bata, indi siya makakonsentrar sa leksyon kag kon malipasan siya sang pagkaon may posibilidad nga maglisa pa ang iya paminsaron.
Ang kondisyon sang paminsaron kag sa nutrisyon sang ginakaon makaapekto man sa pagka-kampiyon.
Buylugan naton ang ini nga plano kag lihok sang DepEd-6. Ginaplastar sang bag-o nga liderato ang direksyon. Yara na sa aton ang pagsubay sa banas agud nga malab-ot naton ang ginahandom nga destinasyon.
Mahapos lab-uton ang kadalag-an kon nagabuylog ang tanan. Ipadayon ang pag-isa. Ipangabuhi ang pagka-kampiyon sa tanan nga tion kag higayon.
Ipabugal sa kaugalingon nga ang DepEd-6 lugar sang mga kampiyon. (bertladera@gmail.com)/PN
