NAGAKABALAKA gid kita sa sining nagatabo nga diskriminasyon batok sa mga Asian Americans, nga nagalakip sang mga Filipino, sugod pa sadtong dinekada na nga tinuig nga nakaligad.
In fact, ining diskriminasyon nagakadto pa kon kis-a sa racial violence.
For many reasons. Katulad sang pagpati sang madamo nga mga White Americans, kag pila pa ka mga puti, nga ang black people “are naturally violent and dangerous”, so balewala sa ila ang police brutality batok sa mga black people.
Nagakatabo na gani ini bisan sa mga Asian Americans, labi na gid sa panahon ni anay President Trump nga nagapati sa “White Supremacy”.
Of course, rason man ang naturalisa sang tawo – mga White Americans indi exception – sa maabtik nga paghusgar sang tawo sandig sa hitsura, panapot, kon paano sila magsugilanon, kag sa mga cultural nga binatasan.
Ang problema pa kay kon kanawong ka sang indi nila mauyunan nga pangayaw nga rasa – Intsik man, Indonesia, Filipino, etc. – ikaw na gid lang ang mamung-an sang ila diskriminasyon.
Pasalamat kita kay ang masami nga panan-aw sa mga Filipino amo nga ini sila mga “smart and quiet”. Ugaling, pwede gihapon mahisaan sila, bisan pa daku ang nabulig sang mga Filipino sa mga Amerikano sa gyera kag sa ikasanyog sini sa madamo nga bagay.
Isa sina ang ila pagtrabaho bilang mga professional nurses nga nagatrabaho para sa ikaayong lawas sang mga tumandok nga mga Amerikano. Subong man ang madamo nga imbensyon sang mga Filipino nga napuslan sang Estados Unidos.
Naglain pa gid kay ginduso ni anay President Trump ang pagpasanyog sang White Supremacy, nga nagpaisug pa gid sa White Americans agud itulod ang ila kuno bentaha sa mga pangayaw nga rasa, katulad sang mga Asyano.
***
Sang sini lang nangamusta kita sa aton mga hinablos nga nagatrabaho sa Estados Unidos bilang mga nars kag mga American citizens na diri parti sa kon bala kon ano man ang ila experyensya sa ginabalita nga mga “hate crimes” sang pila ka White Americans batok sa mga Asyano.
Ang akon mga hinablos nagakabalaka gid kag sa subong nagahalong gid sila sa ila paglagaw sa mga dalanon kag kon diin pwede sila makasumalang sang White Americans, ukon kasubong nga mga puti, nga may indi maayo nga panimuot sa mga Asyano.
Wala pa man sing kasubong nga natabo sa ining akon mga himata. Apang ang balita nagasiling nga madamo na nga mga kaso sang hate crimes dira sa Estados Unidos.
Man, hingalagan lang nga may magtulod ukon magdis-ug sa ila, kon indi man nagapakita sang maaslom nga nawong sa ila kon masugata mo.
May ara gani nga mga kaso sang pagpanakit sa ila, katulad sang pagpanapungol kag pagkutrab sang nawong sang isa ka Filipino.
May yara man nga ginbuno kag gin-pagpangluthang nga grupo sang mga Asyano kon diin apat gid ang napatay.
In fact, wala ini sila pili kon tigulang man ini ukon indi!
Mapasensyahan mo pa seguro kon buang, pero daw hungod gid sa buot kag may malisya ang nagakatabo.
***
Indi ini maayo nga nagakatabo sa Estados Unidos, labi na gid kay ginapabugal gid sini ang kinamatarong sang mga pumuluyo sa civil rights, nga nagakilala sang kinamatarong sang tanan sa equality regardless of race, religion, belief, etc.
Indi dapat pabay-an sang Biden administration ang ining mga violation sang civil rights sang mga Asyano, nga napabayaan ni President Trump tungod man gani sang iya “White Supremacy” policy.
Dapat may penalidad ang kada violation kag indi lang pasugtan nga himuon sang mga hambog kag abusado nga mga puti.
Kag tani indi man magpabaya ang mga Asyano agud madepensahan man nila ang ila mga komunidad batok sining violators sang ila civil rights nga indi lang para sa mga puti kundi lakip man ang mga Asyano./PN
