BY JOEL FRANCO
MASYADO na ang pagbatas sang tanan sa halit nga gintuga sang COVID-19. Apang sa gihapon wala nagakadudla ang tawo. Ini ayhan bangud man sang ila kakulang sang pagsalig sa gobyerno. Ukon sa pagpati nga ginagamit lamang sila agud makanegosyo ang mga kaalyado sang gobyerno.
Sa sin inga sitwasyon, nabilin sa mga pamunuan sang local nga gobyerno ang pagdihon sang mga pagsulondan agud mangin epektibo ang ila away konra sa virus.
Sa mga local nga pamunuan diri sa Iloilo, nakilala ang banwa sang Concepcion sa pagpamauno ni Mayor Raul Banias sa aktibo nga hulag sang ila alcalde gani kun may magpositibo man sa ila banwa madasig nga mahimuan sang lihok agud indi na maglapta.
Ang syudad sang Passi sa idalum ni mayor Stephen Palmares nangin madinalag-on man ang ginapatuman nga mga pagsulondan.
Apang kun may dalayawon nga alkalde, isa na dira ang alkalde sang banwa sang Calinog. Si Mayor Francisco “Ico” Calvo nga nagsiling nga indi man sya makahibalo maghambal apang makahibalo sya sa pagdumala.
Matuod ina bangud sa pihak sang dako nga katungdanan sang banwa bilang tagbalay sang Jalaur River Multipurpose Project – Stage II (Jalaur mega dam) sa Barangay Alibunan, Calinog naatubang sang husto ang mga nagatuhaw nga kaso sang COVID-19.
Ang proyekto ginakontrata sang Daewoo ENC kag masako ang paggwa pasulod sang mga tawo gikan sa iban nga rehiyon kag luwas sang pungsod. Ini amo ang mga Korean engineers kag experts kag mga subcontractors gikan sa iban nga kumpaniya.
Sining karon lang ginpasarado ni Calvo ang opisina sang Daewoo ENC bangud sang pagpositibo sang 25 ka mga empliyado lakip na ang 12 ka mga Koreans.
Nahibaluan lang nga may positibo sang nagpa-swab test ang isa ka Korean nga magabalik kuntani sa Korea. Ang resulta, ang banwa ang naghimo sang contact tracing kag swabbing.
Kun tani sa ila pagsulod, may husto lang nga koordinasyon sa banwa. Isa ini ka nasyonal nga proyekto pero bangud nga ang banwa sang Calinog ang tagbalay, dapat may pagtahod man nga ipahibalo ang nagaalabot nga tawo sa construction site. May higayun abi nga nagakakibot lang ang banwa nga ma-request sang swabbing sa mga new arrivals nga wala gani sang record ang banwa.
Nagadayaw kita kay sa pihak sini, madasig ang mga hulag sang pamunuan sang banwa. Indi man perpekto, apang epektibo ang ginapatuman nga mga lihok. Madamo ang nagareklamo ngaa may lockdown sang nagligad nga bulan sang Marso kada Domingo? Bisan ako nakapamangkot man apang nakita natun nga epektibo in inga straehiya kontra virus.
Nagalaum lang kita nga ang mga opisyal sang banwa mangin mabinuligon sa pagpatuman sang mga dapat nga ipatumann. Indi lang kita tubtob sa social media kag mangin kritiko. Kabay nga sa atun kaugalingon, magpatuman man kita sang husto nga pagsulondan kag mangin masinulondon sa kasuguan./PN
