NABALAKA ang 13th Sangguniang Panlalawigan ng Iloilo sa asud-asud nga aksidente nga nagaluntad sa dalanon nga nag-utas sang pila na ka kabuhi. Madamo na sang panimalay ang nawad-an sang ginikanan, pila na ka kabataan ang nailo bangud sa hinali nga pagkadula nila sa kalibutan tuga sang wala ginalauman nga aksidente sa dalan.
Pinakaulihi nga natabu amo ang vehicular accident sa Pototan, Iloilo sa tunga sang trak kag SUV kon sa diin ginbawian sang kabuhi ang mag-asawa nga sakay sang SUV nga sanday Emil kag Merren Pagtolon-an nga lunsay residente sang Barangay Bagacay, Passi City.
Antes sang sini nga insidente, madamo pa gid nga iban ang una na nga nagluluntad sang damlag lang nga ginakaulamiran naman sang mga motorsiklo.
Sa nasiling na sang iban, bisan ano pa paghalong apang may yara gid sang indi mapulong nga matabu nga magapatulo sang luha bangud sa pagkauyang sang kabuhi.
Sadtong hugot nga ginapatuman ang community quarantine kag ginapaiway ang tanan sa pagbiyahe, halos wala man sang aksidente sa dalanon bangud nga malaka man ang salakyan nga nagataris sa dalan. Apang karon nga naghalog na ang tanan, masami na ang pagluntad sang aksidente.
Wala man nagahahulugan nga indi na lang maggwa ang tawo sa iya balay agud nga wala sang aksidente sa dalan kundi luyag lang naton ipahangop nga kon nagahalong kita mas daku ang posibilidad nga makalikaw kita sa mga aksidente.
Nakita ini nga sitwasyon sang Sangguniang Panlalawigan ng Iloilo rason nga ginduso ini ni 2nd District Board Member June Mondejar sa ila 88th Regular Session nga aprubahan ang iya anum ka resolution nga kabahin sang rekomendasyon sang iya committee report.
Ginalakipan ini sang resolution nga nagahingyo kay Provincial Police Director Col. Gilbert Gorero nga magpahamtang sang mga checkpoint sa mga strategic location sa probinsya sang Iloilo; ikaduha, hingyuon ang tanan nga chiefs of hospitals nga i-record ang kabangdanan sang nagluntad nga vehicular accident sang mga pasyente nga ginapangdangat sa ila ospital.
Ikatatlo, ginahingyo si Gov. Arthur Defensor, Jr. nga magtinguha nga makahiwat sang seminar para sa mga driver sang ambulansya, fire truck kag respond vehicle sang Iloilo Provincial Government kag sang mga component unit agud matudluan sa paghalong sa pagmaneho kon may ginarespondihan sila.
Ikaapat, hingyuon ang Provincial Legal Office nga tun-an ang proposed ordinance nga nagamandu sa mga business establishment nga baligyaan lamang sang motorsiklo ang nagabakal nga may balido nga driver’s license.
Ikalima, hingyuon si Gov. Arthur Defensor, Jr. nga ipatuman sang epektibo ang Traffic Code Ordinance sang probinsya sang Iloilo.
Kag ikaanum, hingyuon si Gov. Arthur Defensor, Jr. nga ipatuman ang “Provincial Ordinance for the Safe Implementation of Road and Bridge Infrastructure Projects in the Province of Iloilo” ukon dapat may warning signs nga ginabutang sa mga ginakay-o nga dalan ukon tulay kag ang warnings signs dapat reflectorized para makita sa tion sang gab-i.
Una na nga naghiwat sang committee hearing ang duha ka komitiba tuhoy sa mga nagaluntad nga vehicular accident.
Nabuyagyag sa ginhiwat nga committee hearing sang damlag lang sang Committee on Public Order and Security nga ginapamunuan ni 2nd District Board Member June Mondejar kag Committee on Transportation, Communication and Public Utilities nga ginapamunuan ni Board Member Ramon Sullano nga 60 percent sang vehicular accident nga nagluntad sa probinsya sang Iloilo ang bangud sa reckless driving.
Ginpahayag ni Mondejar nga ini ang ginpalab-ot nga impormasyon ni IPPO Director Gilbert Gorero kon sa diin ginasundan ini sang driver’s error, driving under the influence of liquor, mechanical defect, kag ineffective warning signs sa mga ginakay-o nga dalan.
Ginsiling nga may proposal nga dapat hugot nga ipatuman sa kabanwahanan ang traffic rules and regulations kag nagaduda sila, bangud wala pa sang supisyente nga datus, nga ang motorsiklo amo ang may pinakadamo nga kaso sang vehicular accident.
Gindugang sini nga may proposal nga dapat may LTO deputized traffic rules and regulations enforcer sa tagsa ka banwa bangud nga kulang sa tawo ang LTO kag indi sila makapadulong sa tagsa ka banwa sa tanan nga tion kag hugot nga magpatuman sang kasuguan.
Mismo ang LTO nakaobserbar nga sa tion sang emerhensya ukon may respondihan ang mga driver sang ambulansya kag fire truck daw kaangay lang nga mga hari sa karsada.
Ginsiling sini nga ipatigayon sang Iloilo Provincial Government ang seminar para sa natumod nga driver santu sa suhestyon sang LTO.
Ginatun-an pa sang Provincial Legal Office ang suhestyon nga indi pagbaligyaan sang motorsiklo ang mga manugbakal nga wala sang driver’s license kag ang baligyaan amo lamang yadtong may driver’s license nga may intindi na sa pagdala sang motorsiklo kag mga patakaran sa trapiko.
Gindugang sini nga dapat ipatuman magtukod sang task force agud ipatuman ang road safety ordinance kag ordinansa para sa safe implementation sang road or bridge infrastructure projects sa probinsya sang Iloilo nga siya man ang author sini.
Sa nasiling ko na, lubos ang kabalaka sang mga katapo sang Provincial Board sa nagakatabu nga vehicular accident rason nga nagapangita sila sang paagi kon paano ini mapahagan-hagan, kon indi man lubos nga matapna, paagi sa pagtumod sa mga kabangdanan kon ngaa ini nagaluntad.
Nag-ulikid gid ang Iloilo Provincial Government sa mga pumuluyo apang kinahanglan man sang tagsa ka indibidwal ang maghalong samtang yara nagataris sa mga dalanon. (bertladera@gmail.com/PN)
