MAS NGA nagdamo ang mga motorista sa dalanon nga nagataris kag kadamuan sa ila ang naga-deliver sang mga pagkaon kag iban pa nga kinahanglanon.
Nagapabilin nga buhi kag mapagsik ang lakat sang iban nga negosyo bangud sa bulig sang sini nga serbisyo. Nagalikaw ang tawo nga magpadulong sa lugar nga madamo sang tawo kag ang ila pagbakal ang ginatugyan na lang sa mga food rider.
Ang bantugon nga physicist nga si Albert Einstein nagsiling “Life is like riding a bicycle to keep your balance you must keep moving.”
Kadamuan sa mga amay sang puluy-an ukon mga breadwinner sa tagsa ka panimalay nga nawad-an sang trabaho ang nakasapnay sa sini nga sahi sang palamugnan.
Mabatian naton ang sugilanon kon paano nila ginataklad ang kapigaduhon bangud sa epekto sang pandemya. Nagarisgo sila sa pagbakal kag pagdul-ong sang mga pagkaon sa bisan diin man nga bahin sang Iloilo lamang nga makaganar kag may ibakal sang kinahanglanon sa ila tagsa ka panimalay.
Nangin paborable sa sini nga sahi sang negosyo ang sitwasyon sa karon nga may yara sang pandemya. Matuod ang ginasiling nga may oportunidad sa kalamidad. May grasya sa basura. May kwarta sa pandemya. Ini, kon kahibalo lamang magpangita sang paagi ang natungdan agud nga siya ang indi mawad-an sang sentimos sa iya matag-adlaw nga paghimakas.
Makapoy man ang magparondalya sang motorsiklo sa dalan, nagasulay sa init kag ulan, kag kon kaisa ginademalas pa kon maaberya ang motorsiklo nga ginagamit sa palangabuhian.
Kon kaisa nagakasalaw man sila sa masakit nga tinaga nga ginahaboy sa ila apang ila na lang ginahangop para sa ila palangabuhian.
May mga kustomer man nga ginapahulat sila sing malawig nga tion nga nagasablag sa ila na makaagkon sang dugang nga kita.
Madamo sa ila ang nawad-an sang trabaho bangud sa pandemya. Kadamuan sa ila mga nagasakay sa barko, mga nagadumala sa mga negosyo, mga nagaganar sadto sang komportable nga kita. Pagkadula sang ila kita, wala sila nagpungko lamang kag magpamusi-musi. Nagpaminsar sila nga maghimakaskag indi maglantaw sa ila nagliligad, ila gin-atubang ang karon nga sitwasyon para sa mas masanag nga palaabuton.
Kon ang nawad-an sang trabaho wala na nagpaninguha, posible mas nagdamo ang istambay kag mas palaligban sang gobyerno ang pagtuhaw sang magagmay nga sahi sang krimen. Apang bangud sila ang mga propesyunal kag ang dalagan sang pinsar amo ang makakita sang patas kag legal nga pangabuhian, sila ang nag-adoptar sa sahi sang sitwasyon kag pangabuhi may yara sila sa karon.
Kinahanglan lang ang padayon nga paghulag agud nga magbalanse ang aton kabuhi, kangay sa ginsiling ni Albert Einstein. Madamo sang paagi kon luyag naton nga makatibawas kag katamaron lang ang rason kon indi kita luyag nga mag-uswag.
Madamo na sang sitwasyon nga ginlahugan man sang kapalaran ang mga food rider apang sa pihak sini nagapabilin ang ila determinasyon agud nga makapangabuhi sang patas kag makataklad sa matag-adlaw nga kinahanglanon.
Kinahanglan lang naton sila nga hangpon sa ila trabaho, indi pag-akigan kon atrasado kag palipayon paagi sa paghatag sang dugang nga kantidad, bisan gamay lang ina apang makabulig na sing lubos.
Bulahan ang mga kustomer nga maalwan nga nagabayad sang sobra sa dapat bayaran bilang pakonswelo sa serbisyo sang nagahimakas nga tawo.
Dapat mangin inspirasyon man sila sa mga nagatambay lamang kag daw nadulaan sang paglaum bangud gintapas sang pandemya ang ila handom. Ang pagbato sang mga food rider sa pandemya ang dapat kabigon nga ehemplo nga kita ang may ikasangkol nga magpangibabaw sa sini nga sitwasyon.
Lauman naton nga mas magadamo pa gid sila sa sini nga sahi sang serbisyo. Kadamuan sa ila mga propesyunal nga naga-sideline kag ginagamit ang ila personal kag matahum nga mga motorsiklo sa pagserbisyo. Gingamit man nila ang ila bakante nga panahon para diri. Wala sang pressure sa oras bangud nga ang rider may opsyon sa iya luyag nga pagtrabaho.
May bataon pa kag may pamilyado nga food rider. Isa lang ang ila tinutuyo, luyag nila nga mabuhi ang ila pamilya sa sini nga sahi sang pagserbisyo sa mga tawo.
Nagabalikid sila sa kahimtangan sang ila pamilya kag nagarisgo sa tunga sang pandemya lamang nga masabat ang matag-adlaw nga kinahanglanon sa panimalay.
Padayon lang sa paghulag agud nga mabalanse ang aton pag-abante sa kabuhi. Indi magpalingkang sa sitwasyon dala sang pandemya. (bertladera@gmail.com/PN)
